Partia Demokratike vijon të japë sinjale të forta sa i takon thirrjes së ndërkombëtarëve për tu ulur në tryezë me Partinë Socialiste, për reformën zgjedhore. Në një prononcim për mediat, kreu i grupit të punës për reformën zgjedhore, Oerd Bylykbashi, tha dje sePartia Demokratike ka filluar punën për reformën zgjedhore, jo thjesht për të treguar se nuk është ajo që bllokon procesin e reformës, por për të bërë gati zgjidhjet për çdo problematikë, që sipas opozitës duhet të përfshijë reforma për të garantuar një proces të lirë e të ndershëm. “Prioritete si ato që janë; financimi i partive politike që është një çështje prioritare për sa na takon ne, është votimi elektronik mbetet një çështje shume e rëndësishme për të shmangur manipulimet që bëjnë partitë politike nëpërmjet komisionerëve apo elementeve kriminale për të manipuluar votën e shqiptarëve. Gjithashtu ne do të diskutojmë çështje të rëndësishme si sistemi zgjedhor, administrata zgjedhore apo votimi i emigranteve”, ka deklaruar për mediat Bylykbashi. Zërave se mund të ketë një marrëveshje mes PD dhe PS për reformën zgjedhore, i ka dhënë një konfirmim Bylykbashi duke folur për konsensus mes palësh. Edhe pse ende nuk ka konsensus për mekanizmin që përfshin opozitën nëprocesin e reformës, PD nuk e njeh Komisionin e Reformës Zgjedhore e rruga për miratimin e saj me konsensus për PD është vetëm një. “Ne ecim me idenë që sigurisht që mekanizmi jashtë parlamentar do të çojë drejt një dakordësisë për zgjidhje specifike e më pas aprovimi nga Parlamenti pa ndryshim të asaj që bihet dakord në këtë mekanizëm që do të prodhojë konsensusin politik”, u shpreh ai. Nga ana tjetër, eksperti i zgjedhjeve në PD, Oerd Bylykbashi është i vetëdijshëm se ndryshimi i ligjeve nuk mjafton, teksa shton se kjo është edhe kërkesa e ndërkombëtarëve. “Shitblerja e votës që është rekomandim prioritar, presioni mbi zgjedhësit në mënyre të veçantë mbi ata që punojnë në administratë, janë sot të ndaluara nga Kodi Zgjedhor e Kodi Penal, por nuk ka as ndjekje penale e as garanci që jepen nga KQZ apo gjykatat e për rrjedhojë për këto sado që ta ndryshojmë Kodin Zgjedhor nuk ndryshojmë asgjë në lidhje me mungesën e vullnetit të Edi Ramës dhe qeverisë për ta zbatuar. Këtë kërkojmë ne dhe ndërkombëtaret janë gjithnjë e më afër një ideje që do të çonte në një zgjidhje efektive pa u marrë shumë me modalitetet formale”, tha ai. Po të shohim si do reagojë LSI,e cila i trembet reformës zgjedhore.
