Ish-kryeministri i Kosovës, Ramush Haradinaj nëpërmjet një postimi në rrjetet sociale ka komentuar zgjedhjet vetëm pa orë pas përfundimit të tyre. Haradinaj është shprehur i lumtur për dorëheqjen e tij, pasi sipas mendimit të tij ajo ka rezultuar e drejtë dhe thekson se gara ishte e qetë dhe vendosi një standart të ri të pjekurisë politike në Kosovë.
Nëpërmjet statusit, Haradinaj ndër të tjera la të nënkuptohej edhe vetofrimi i tij për të qenë pjesë e qeverisë së re që do të krijohet në legjislaturën e shtatë të parlamentit të Kosovës.
Postimi i plotë:
Vendimi im për t’ia kthyer sovranit vendimmarrjen, pikërisht në kohë udhëkryqi për Kosovën, sot u vërtetua që ishte veprim i drejtë.
Fillimisht dua t’i falënderoj strukturat e Aleancës, aktivistët e mbështetësit e në veçanti secilin votues, që besuan dhe e votuan koalicionin AAK-PSD, duke u shprehë mirënjohjen time të thellë për punën e palodhshme dhe besimin e palëkundur që na e falën.
Po sot, dëshiroj të falënderoj institucionet shtetërore që kishin barrën e organizimit të zgjedhjeve dhe mbarëvajtjen e tyre, për përgjegjësinë e lartë të treguar në detyrë, përgjatë gjithë këtij procesi që ende po vazhdon.
Gara e drejt dhe e qetë, e ngriti Kosovën dhe qytetarët e saj në një standard të ri të pjekurisë politike dhe demokratike, duke shërbyer si model shembull në rajon. Për këtë meritore janë të gjitha partitë politike, pa dallim.
Uroj që me të njejtin nivel maturie, të mbyllet edhe ky cikël elektoral, duke i hapë rrugë pa vonesa, konstituimit të Kuvendit, dhe institucioneve të reja demokratike në vend.
Kosova sot nuk dallon nga vendet me demokraci të avancuar, duke dëshmuar se jemi po aq europian sa secili vend tjetër në Europë, dhe kërkesat tona për integrim dhe respektim të shtetit e sovranitetit tonë, janë të drejta të pamohueshme, ashtu siç është e paprekshme, Kosova e 17 shkurtit.
Kosovë, na presin sfida!
RH
