Kolegji i Posaçëm i Apelimit, për të parën herë ka rrëzuar Operacionin Ndërkombëtar të Monitorimit. Që në momentin që nisi vetingu e deri më tani, çdo gjyqtar a prokuror i konfirmuar në detyrë, por që u ankimua nga ndërkombëtarët ishte shkarkuar. Dje KPA për herë të parë vendosi kundër tyre. Në këtë mënyrë u la në fuqi vendimi i Komisionit të Pavarur të Kualifikimit, ku u la në detyrë gjyqtari i Gjykatës Administrative të Shkallës së Parë në Tiranë Gentian Medja. Kryesuesja Natasha Mulaj, u shpreh se Kolegji ka vendosur me shumicë votash lënien në fuqi të vendimit të KPK-së për konfirmimin në detyrë të Medjas. Ajo sqaroi se ishte marrë parasysh kërkesa e Komisionerit Publik që Kolegji të arsyetojë në vendimin e tij edhe orientimin që duhet të ketë Komisioni lidhur me vlerësimin e kriterit të aftësive profesionale. “KPA shikon të nevojshme që në arsyetimin e plotë të vendimit që lidhet me këtë çështje të japë edhe orientimin e tij në lidhje me kryerjen e procesit të rivlerësimit për sa i përket kriterit të aftësive profesionale. Në përfundim, Kolegji, pasi mori në shqyrtim metodologjinë e propozuar nga Komisioneri Publik shqyrtoi vendimin e KPK, mbështetur në kriteret dhe treguesit që janë përdorur në këtë metodologji, arriti në përfundimin se vendimi i KPK është i drejtë dhe duhet lënë në fuqi. Për këto arsye, trupi gjykues i KPA, me shumicë votash vendosi lënien në fuqi të vendimit të KPK për Medja”, u shpreh kryesuesja Natasha Mulaj. Komisioneri Publik kishte ushtruar ankim në Kolegjin e Posaçëm të Apelimit pranë Gjykatës Kushtetuese, kundër vendimit nr.60 të dhënë më 1 gusht 2018 nga Komisioni i Pavarur i Kualifikimit, për konfirmimin në detyrë të subjektit të rivlerësimit. Në vlerësimin e Komisionerit Publik, në rastin konkret, hetimi i Komisionit të Pavarur të Kualifikimit për vlerësimin e aftësisë profesionale nuk ishte i plotë, duke u konsideruar i pamjaftueshëm për të konfirmuar në detyrë gjyqtarin Gentian Medja. Mbështetur edhe në rekomandimin e komisionit të përfaqësuesve të ONM-së, për të ankimuar vendimin e KPK, Komisioneri Publik i kërkoi Kolegjit të Posaçëm të Apelimit të kryente rivlerësimin e aftësive profesionale të gjyqtarit Gentian Medja, duke u bazuar në një metodologji, që përmban indikatorë objektivë për evidentimin e nivelit të përmbushjes së kritereve ligjore, të parashikuara në ligjin nr.96/2016. Në përfundim KPA vendosi lënien në fuqi të vendimi të KPK dhënë më 1 gusht të vitit të kaluar për gjyqtarin Medja. KPK shkarkon Gjovalin Përnocën Ndërsa Komisioni i Pavarur i Kualifikimit shkarkoi ditën e djeshme nga detyra gjyqtarin e Gjykatës së Apelit për Krimet e Rënda Tiranë, Gjovalin Përnoca. Ai u përball me vetingun për tre kriteret klasike të vlerësimit, atë të ligjshmërisë së pasurisë, kriterin etik dhe profesional. Trupa gjykuese e kryesuar nga Xhensila Pine dhe me anëtarë Suela Zhegu dhe Olsi Komici, e gjeti atë me probleme në kolonën e pasurisë. Gjovalin Përnoca ka një karrierë të gjatë në sistemin e drejtësisë, ku ka shërbyer fillimisht si gjyqtar në Mirditë dhe Shkodër dhe për 4 vjet si inspektor në Këshillin e Lartë të Drejtësisë. Në vitin 2003, Përnoca është zgjedhur gjyqtar i Gjykatës së Apelit për Krime të Rënda, detyrë të cilën e ka ushtruar tashmë prej 15 vitesh. Përnoca ka qenë gjithashtu edhe anëtar i Këshillit të Lartë të Drejtësisë si dhe është dekretuar nga Presidenti i Republikës për Gjykatën e Lartë, pa mundur që të zgjidhet më pas në Parlament./Elisjeda KIKO
