Filmi “Pranverë e paharruar në fshatin e harruar” me skenar dhe regji nga Kushtrim Bekteshi pati premierën në Shkup. Produksioni bëri bashkë artistë dhe producentë nga Maqedonia, Kosova dhe Shqipëria. Me një kastë aktorësh të njohur filmi është pranuar dhe në selektimin zyrtar të Festivalit Ndërkombëtar të Filmit në Moskë (MIFF). Është punuar për një kohë të gjatë dhe me seriozitet për këtë projekt filmi. Dramaturgjia është e konsoliduar nga ana e regjisorit Kushtrim Bekteshi. E veçanta në film, të gjithë aktorët flasin me një dialekt, edhe pse janë nga Maqedonia, Shqipëria dhe Kosova. Aktore në film Taulanda Jupi spikat këtë herë me rolin e saj. Për filmin ajo shprehet se atë që nuk bëri dot politika e bëri arti. “Regjisori Kushtrim Bekteshi bëri atë që nuk bën politika në këtë moment, që i zhbëri kufijtë në trojet shqiptare. Aty kemi aktorë dhe producentë nga Kosova, Shqipëria dhe Maqedonia. Pra në një farë mënyre arti është në gjendje të bëjë atë që politika nuk bën dot”, shprehet aktorja. Fatimja që luhet në film nga Taulanda Jupi është një grua rreth të 40-tave. Jeton në fshat, përpiqet shumë për familjen e saj dhe përballon të gjitha punët. Rrit fëmijët, mban familjen, pra investohet e gjitha me energjitë e saj në punët e shtëpisë. Kjo është bota e këtyre grave në këtë fshat të humbur që tregohet në filmin. Aktorja tregon se personazhi kishte të veçantat e tij dhe premiera e filmit ishte me shumë emocione. “Personazhi im në rradhë të parë më pëlqeu sepse është totalisht jashtë natyrës sime dhe mua më pëlqejnë sfidat që janë jashtë natyrës sime. Roli i Fatimes për mua përbënte një sukses nga ana profesionale. E konsideruar si sfidë në fakt edhe në momentin kur mora rolin, sepse duhet të flisnim jo në gjuhë elitare, por në një gjuhë të thyer, si gjuha e shqiptarëve të Maqedonisë. E bukura filmit pavarësisht gjuhës, fshati nuk ka emër, mund të jetë në Shqipëri, mund të jetë në një vend tjetër në jug të Maqedonisë apo Kosovë, pra kudo dhe ku ka një realitet fetaro mysliman, sepse e ka frymën e fesë brenda”, tregon aktorja. Prof.acs. Taulanda Jupi (aktore /regjisore) ka lindur në Tiranë, diplomuar në Akademinë e Arteve (sot UART). Mban ҫmimin Aktorja e Vitit 2012, dhënë nga Akademia KULT për rolin e saj në dramën “Shtëpia e Bernarda Albës”. Lektore në lëndën “Teknika e të folurit” dhe “Mjeshtria e Aktorit” në Fakultetin e Artit Skenik, pranë Universitetit të Arteve në Tiranë, që prej 15 vjetësh. Autore, aktore dhe bashkëregjisore e monodramës “Malkony”. Kjo monodramë u shkrua pas intervistimit të grave të diagnostikuar me kancer të gjirit dhe është një vepër dedikuar atyre. Projekti mbështetet nga UART dhe Top Channel . Aktiviteti i saj njihte dhe si drejtuese artistike e spektaklit multidisiplinor “Stop”, një event disa vjeҫar sensibilizues kundër dhunës ndaj grave. Në jetën artistike përmendim rolet në komedinë “Gënjeshtari” , në komedinë muzikore“ Opera për tre groshë” në Teatrin Kombëtar. Aktore në tragjikomedinë “Viktimat e detyrës” me trupën e Akademisë së Arteve. Aktore në komedinë “Kati i gjashtë” në TK dhe “Ëndërr e një nate vere”, teatri Coulture Etage, Oldenburg, Gjermani.
Historia në film
Jetën e zakonshme dhe të qetë të një fshati të harruar e çrregullon ardhja e tri prostitutave në kafenenë e fshatit. Burrat, edhe përkundër përpjekjeve të grave të tyre për t’i ndaluar, tërë kohën e kalojnë në kafene duke shpenzuar gjithë paratë në alkool dhe seks. Në shkollë fillon të mbizotërojë një gjendje kaotike. Hoxha i fshatit e humb autoritetin dhe xhamia mbetet pa besimtarë. Vetëm dy të rinjtë përfitojnë nga kjo rrethanë duke arritur ta realizojnë lidhjen e dashurisë të ndaluar nga prindërit. Në fund gratë e fshatit çohen në kryengritje dhe si pasojë kafeneja digjet, ndërsa jeta në fshat duket se do të kthehet përsëri në normalitet. Filmi “Pranverë e paharruar në fshatin e harruar” është bashkëprodhim në mes Manufaktura Production (Maqedoni) me producent Sasho Pavslovski, Media & Film Production (Kosovë) me producent Mumin Jashari, Ska-Ndal Production (Shqipëri) me producent Genc Permeti dhe Skupifestival (Maqedoni) me producent Muzbajdin Qamili dhe Osman Ahmeti. Drejtori i fotografisë në këtë film është Almir Gjikolli, muzikën origjinale e ka kompozuar Trimor Dhomi, montazhin e ka bërë Radovan Petroviç, skenograf është Durim Neziri, kostumografe Zhaklina Krstevska dhe dizajner i zërit Darko Spasovski. Filmi është xhiruar në fshatin Gjonomadh të rrethit të Korçës. Drejtori i fotografisë në këtë film është Almir Gjikolli, muzikën origjinale e ka kompozuar Trimor Dhomi, montazhin e ka bërë Radovan Petroviç, skenograf është Durim Neziri, kostumografe Zhaklina Krstevska dhe dizajner i zërit Darko Spasovski. Në film është përfshirë një kastë e madhe aktorësh si Shkumbin Istrefi, Osman Ahmeti, Ndriçim Xhepa, Luan Jaha, Salaetin Bilall, Muzbajdin Qamili, Vjollca Bekteshi Hamiti, Adriana Matoshi, Diana Spasova, Hismet Ramadani, Musa Isufi, Ervin Bejleri, Romir Zalla, Adrian Aziri, Bujar Ahmeti, Shengyl Ismaili, Donikë Ahmeti, Taulanda Jupi, Mona Mustafa, Sokol Hajrullai, Ilire Vinca, etj.
Nga Julia Vrapi
