Deklarata dje e ambasadës gjermane, ku flitej për një qeveri legjitime, nuk është pritur aspak mirë nga Lëvizja Socialiste për Integrim. Djegia e mandateve duket se po i fut në luftë me ndërkombëtarët partitë opozitare, por më e revoltuar duket partia e presidentit. Ishte Luan Rama ai që replikoi ashpër me ambasadoren gjermane. “E lexova me vëmendje deklaratën e ambasadores së Republikës Federale të Gjermanisë në Tiranë, të publikuar gati dy orë më parë. E madje, edhe e rilexova, për ta motivuar më shumë veten drejt vullnetit të mirë jo vetëm për ta mirëkuptuar atë, por, edhe për t’i dhënë vetes një mundësi reflektimi! Dhe natyrisht, e mirëkuptoj plotësisht. E mirëkuptoj dhe e justifikoj. Sepse zonja ambasadore as që e ka idenë se në ç’gjendje është cilësia e demokracisë në Shqipëri, ku shumicën parlamentare e përcaktojnë votat e blera nga grupet kriminale dhe jo vullneti i lirë i qytetarëve, siç ndodh në Gjermaninë e saj e kudo tjetër në botën demokratike! Të paktën, këtë perceptim më jep mundësinë të kem deklarata e saj. Por, në këtë çështje, nuk mund ta ndihmoj më shumë se kaq. Thjeshtë, vetëm mund ta mirëkuptoj e po aq ta justifikoj”, tha ai.
Më tej, Luan Rama deklaroi se në Gjermani nuk ka përgjime të prokurorisë, ku dokumentohet se kriminelë flasin për blerje votash. “Sepse, unë e di që në Gjermani nuk ka ndodhur ndonjëherë që Kancelari Federal të ketë marrë në mbrojtje e të ketë kandiduar në listat e partisë së vet kriminelë, për t’i bërë deputetë dhe kryetarë bashkish! Unë e di që në Gjermani nuk ndodh si në Shqipëri ku nuk funksionon prej kohësh Gjykata Kushtetuese dhe Gjykata e Lartë dhe as nuk janë në kolaps e të bllokuara gjykatat e niveleve të tjera! Ndaj, thjeshtë vetëm mund ta mirëkuptoj e po aq ta justifikoj zonjën ambasadore të Gjermanisë”, tha ai. Por Luan Ramës nuk i ka dalë me kaq inati, pasi në shkrimin super të gjatë i ka drejtuar dhe një pyetje ambasadores: “A mund të ketë demokraci në një vend ku nuk ka drejtësi dhe a mund të ketë drejtësi në atë vend ku nuk ka Gjykatë Kushtetuese dhe Gjykatë të Lartë?!”. Në fund Rama e mbyll me idenë se ndërkombëtarët flasin në një mënyrë që nuk e bëjnë fare në vendet e tyre.
