Komisioni i Pavarur i Kualifikimit zbardhi dje të gjitha arsyet pse shkarkoi nga detyra kryetarin e Gjykatës së Shkodrës, Arben Zefi. Në vendim thuhet se Zefi është i përfshirë në korrupsion pasiv sepse ka pranuar një shumë parash për të liruar nga burgu një të akuzuar për disa vepra penale. “Disponohen të dhëna ku subjekti i rivlerësimit përfshihet në veprimtari të kundërligjshme, shfaqur në formën e korrupsionit pasiv të gjyqtarit për në disa procese gjyqësore në Gjykatën e Rrethit Gjyqësor Shkodër. Dyshohet se ka pasur kontakte të papërshtatshme. Është i përfshirë në veprime korruptive për një çështje penale duke marrë përsipër lirimin e një personi të akuzuar për disa vepra penale kundrejt përfitimit të një shume të caktuar parash. Një ndër personat e implikuar në dhënien e vendimeve gjyqësore është edhe gjyqtari Arben Zefi. Bazuar në informacionet që disponohen në ngarkim të subjektit të rivlerësimit për implikimin e tij në veprimtari korruptive, në kohështrirje gjatë viteve përpara dhe gjatë periudhës së rivlerësimit, evidentohet kryerja e veprimtarisë së paligjshme në mënyrë të përsëritur gjatë ushtrimit të detyrës nga ana e subjektit të rivlerësimit, si gjyqtar në Gjykatën e Rrethit Gjyqësor Shkodër”, thuhet në vendim.
Aty theksohet se Arben Zefi po ashtu ka kontakte edhe me krimin e organizuar. Përveç problemeve me integritetin e figurës, KPK sqaroi se gjyqtari i Shkodrës nuk justifikon as pasurinë. “Subjekti i rivlerësimit ka bërë deklarim të pasaktë dhe jo në përputhje me ligjin pasi nuk ka deklaruar në deklaratën “Veting” marrëveshjen që ka pasur me shoqërinë për përfitimin e pasurive të paluajtshme. Subjekti i rivlerësimit ka bërë deklarim të pasaktë dhe jo në përputhje me ligjin pasi ka dhënë deklarim të pamjaftueshëm në lidhje me marrëdhënien që ka me shoqërinë. Subjekti i rivlerësimit gjendet në situatën e konfliktit të interesit pasi ka shqyrtuar një padi të shoqërisë duke qenë ende në marrëdhënie interesi me të”, thuhet në vendimin e KPK.
