Ish ministrja e Kulturës Mirela Kumbaro nuk bashkëpunoi me Sindikatën e Pavarur të Artistëve të Shqipërisë, ku dhe kërkesat për takime mbi problemet e artit dhe në institucione nuk u diskutuan si duhet. Arti dhe kultura mes problemeve ka bërë që Sindikata e Pavarur e Artistëve të Shqipërisë ti drejtohet me një letër ministres së Kulturës Elva Margariti. Ndërsa i rendisin kërkesat e tyre ata i kujtojnë ministres së re, që nga ish ministrja Kumbaro nuk kanë pasur bashkëpunim. Presidenti i SPASH, Reshat Ibrahimi shprehet se me Kumbaron vetëm në 2014 është zhvilluar një takim i kryesisë së sindikatës. “Fatkeqësisht me Kumbaron nuk u bë i mundur ky bashkëpunim, pasi është papranueshme që për pesë vjet e gjysmë ministre, të takohet vetëm njëherë me kryesinë e sindikatës, atë të datës 9 dhjetor 2014”, tregon presidenti i SPASH. Sipas Ibrahimit në gjendjen që ndodhet arti dhe kultura ky takim duhet të zhvillohet sa më shpejt. “Kërkesat tona dihen, statusi i artit dhe ligji mbi artin dhe kulturën. Takimi të bëhet sa më shpejt. Ne e kemi bërë prezent situatën që ndodhen institucionet dhe artistët, është një ministre e re dhe duhet të presë në takim Sindikatën. Mos na ndodhë si me ish ministren e Kulturës Mirela Kumbaro që më shumë se pesë vite e gjysmë në Ministri të Kulturës vetëm njëherë na priti si kryesi të sindikatës”, shprehet mes të tjerave presidenti i SPASH. Duke u ndalur në problemet që po vijojnë dhe këtë vit presidenti i SPASH tregon se letra mban datën 23 janar të këtij viti dhe ata i drejtohen Ministrisë së Kulturës me shpresën që të ketë ndryshime. “Gjendja e artit dhe kulturës në vend vazhdon të jetë me shumë probleme. Është një situatë e ngrirë sidomos së fundmi ku çdo gjë është kaotike. Nuk ka asnjë ndryshim, por ne presim të nisin ndryshimet kur ministrja e Kulturës Elva Margariti të ulet me sindikatën dhe të fillojmë diskutimet dhe realizim të kërkesave tona. Problemet që ne trajtojmë janë për të gjithë artistët. Ligji të ri mbi artin, pasi institucionet e artit janë në kaos të plotë, ai aktual është i dështuar. Në më shumë se pesë vite ish ministrja Kumbaro nuk pati dashamirësi dhe vullnetin e mirë për të bashkëpunuar, komunikuar dhe të bërë ligjin e ri të artit, për të bërë statusin e artistit që është kryesori. Nuk bëri asgjë Kumbaro, u përkeqësua disa herë situata në art dhe kulturë”, tregon më tej Reshat Ibrahimi.
Letra e SPASH
Në letrën me 4 kërkesa të datës 23 janar që i është drejtuar ministres Elva Margariti, SPASH shkruan se shpreson se do të zgjidhen, pasi janë të rëndësishme për artin dhe kulturën në Shqipëri, dhe kanë mbi 10 vjet që i kërkojnë. “1. Duhet të miratohet në parlament statusi i artistit, të cilin sindikata ka mbi dhjetë vjet që e ka përgatitur dhe është i gatshëm për ta diskutuar. Në këtë projekt status, është një nen shumë i rëndësishëm që ka të bëjë me uljen e moshës së daljes në pension të artistëve, për tre gjini arti, valltarët, balerinët dhe artistët e cirkut, ku realizohet reforma më e thellë në fushën e artit, pasi po na kthehen institucionet e kulturës në azile pleqsh. Ne e kemi të gatshëm projektin, duhet vetëm vullneti dhe dëshira e mirë e juaja zonja ministre dhe e qeverisë”, shkruan SPASH. Për SPASH duhet që të bëhet ligj i ri mbi artin dhe kulturën dhe shpreh qëndrimin në mbrojtje të Teatrit Kombëtar. “2. Ky ligj që është ka nxjerrë shumë probleme dhe nuk i përgjigjet stadit aktual të kohës, në fushën e artit dhe kulturës në Shqipëri. SPASH është e gatshme të kontribuojë në hartimin dhe përpilimin e këtij ligji. 3. Ju vëmë në dijeni se SPASH ka paraqitur vendimin e tij në MK për të rikonstruktuar godinën e Teatrit Kombëtar dhe jo për ta shembur, por parlamenti ka vendosur për këtë çështje dhe sindikata do të rezistojë për ta mos shembur. 4. Për të diskutuar për këto kërkesa jemi në pritje të takimit me kryesinë e SPASH në një kohë sa më të shpejtë”, përfundon letra e SPASH drejtuar ministres Margariti.
Nga Julia Vrapi
