Juventusi fitoi trofeun e parë për vitin 2019 dhe është Superkupa e Italisë. Por vëmendja shkon tek Kristiano Ronaldo, i cili realizoi golin e fitores dhe rrëmbyer trofeun e parë me “Zonjën e Vjetër” italiane në këtë sezon. Takimi i luajtur në Arabinë Saudite, për herë të parë për këtë aktivitet që luhet në këtë vend, dhuroi mjaft emocione dhe pati spektakël, që buronte nga madhështia që mori ndeshja si nga pjesëmarrja, reklamimi dhe paraja e madhe që qarkulloi për këtë ndeshje, si në imazh, të drejtën televizive dhe biletat. Në stadium pati mjaft femra arabe, një risi për vetë shtetin islamik që shquhet për zakonte tradicionale ku femrave nuk u lejohen shumë gjëra, përfshirë dhe vajtja në stadiume. Për Juventusin ky ishte një sukses i madh, sepse e nis vitin 2019 me trofe dhe me një trofe me peshë sikurse është Superkupa e Italisë. Në ndeshjen kundër Milanit ishte pak dhe me fat, pasi kuqezinjtë goditën edhe shtyllën me Kutronen në këtë takim, ndërkohë që goli i Ronaldos në minutën e 62-të dyshohej se ishte në pozicion jashtë loje. Gjithsesi, në fund vlen fitorja dhe Juventusi kthehet nga Arabia me një trofe. Me vlerë ky trofe ishte sidomos për Ronaldon, i cili e nis mbarë aventurën me bardhezinjtë.
Ndeshja
Juventusi vijon të triumfojë dhe nga Jedah të Arabisë Saudite fitoi edhe Superkupën Italiane të vitit 2018, duke mposhtur në finale Milanin me rezultatin minimal 1-0. Në fakt bardhezinjtë fituan gjithçka në sezonin e kaluar në Itali, por ashtu siç parashikohet nga rregullorja, pikërisht finalistja e Kupës së Italisë, u përzgjodh edhe për finalen e Superkupës, që sërish shkoi në favor të Juventusit. Sfida u vendos nga një gol i shënuar nga Kristiano Ronaldo në minutën e 62-të të takimit, me portugezin që shfrytëzoi në mënyrë perfekte një krosim të Pjaniç dhe mposhti Donarumën me kokë, duke fituar trofeun e parë me skuadrën bardhezi. Meriton përgëzime edhe skuadra e Gatuzos, e cila luajti si e barabartë dhe kërkoi deri në fund golin e barazimit, ndonëse që prej minutës së 73-të, luajti me një lojtar më pak, pasi Kesie u ndëshkua me karton të kuq për një ndërhyrje të ashpër ndaj Pjaniç. Sulmuesi Patrik Kutrone ishte nga më problematikët për mbrojtjen e Juventusit, pasi përveçse një rrezik konstant, goditi edhe traversën e portës së Sheznit, kur rezultati ishte ende i barabartë. Me këtë triumf Juventusi çon në 7 numrin e Superkupave të fituara, nga 13 herë gjithsej kur ka garuar, ndërsa po 7 herë e ka fituar edhe Milani këtë trofe, por sot njohu dështimin e katërt në historinë e këtij kompeticioni. Një sukses për Juventusin, por edhe për Milanin, ku në Arabinë Saudite dhuruan spektakël, emocione dhe i dhanë edhe vetë vendit arab një dimension të ri për këtë sporti magjik.
Adriatik BALLA