Arrestimi i Klement Balilit ka bërë jehonë në mediet ndërkombëtare. Përveç faktit se theksi është vënë te lidhjet e tij me trafiqet, një rëndësi kanë marrë edhe lidhjet e tij me politikën. Agjencia e lajmeve “Reuters”, i ka kushtuar një shkrim arrestimit të tij, ku theksi vihet padyshim te lidhjet e tij me Lëvizjen Socialiste për Integrim. Në të njëjtën linjë ka qenë edhe “New York Times, por edhe media greke “Kathimerini”. Pothuajse të gjitha mediet, kanë vënë në pah faktin se, Balili ka mbajtur post publike gjatë kohës që LSI ishte në aleancë me PS. “Avokati grek i Balilit pretendon se Greqia ka ngritur një çështje nga asgjëja kundër tij. Kurse avokati shqiptar, Theodhori Sollaku tha të martën se provat janë të dyshimta. 48-vjeçar Balili drejtonte departamentin e ndërtimit të rrugëve dhe transportit në qytetin e Sarandës, ku ka në pronësi një hotel luksoz dhe pjesë në një tjetër deri në fillim të vitit 2016. Ai kishte lidhje politike me partinë Lëvizja Socialiste për Integrim, një partner më i vogël në koalicionin qeverisës të udhëhequr nga Partia Socialiste nga viti 2013 deri në vitin 2017, kur Rama i ‘hoqi’ për të fituar një mandat pa aleatë”, shkruhet në artikullin e “Reuters”.
Më tej në artikull theksohet se aleatët perëndimorw i ushtruan presion Shqipërisë për të mbledhur Këshillin e Sigurisë për arrestimin e Balilit, pasi rrjeti i tij ishte përhapur jo vetëm në vendet fqinje por edhe ato që janë aleate të NATO-s. “Në shkurt të vitit 2017, presioni nga aleatët perëndimorë detyroi Shqipërinë që të mbledhë Këshillin e Sigurisë që të vendosë si prioritet kapjen e Balilit pasi rrjeti i tij i drogës ishte përhapur në vendet fqinje dhe aleatët e NATO-s. Ministri i Brendshëm, Sandër Lleshaj u tha reporterëve se arrestimi i Balilit nënkupton se policia shqiptare, e cila ka dështuar në më shumë se dhjetë operacione për kapjen e tij, ka bërë një kapërcim historik në ‘mentalitetin e dështimit’ në kapjen e bosëve të mëdhenj të drogës”, shkruhet në artikull. Në agjencinë e lajmeve “Reuters” gjithashtu thuhet se kryeministri Rama e ka shtyrë policinë që të siguronte kapjen e Balilit, mbas thirrjeve të shumta që kishte bërë ish ambasadori amerikan Donald Lu. Në artikull shkruhet se Balili u shfaq në publik mbas akuzave të policisë greke kur punonte me DEA-n amerikane. “Thirrjet e vazhdueshme nga ish-ambasadori amerikan, Donald Lu, e shtynë kryeministrin Edi Rama që të kërkonte nga policia që të siguronte se ai do ishte në qeli përpara se të mbërrinte zëvendësi i Lu. Balili mohoi çdo implikim dhe u shfaq në publik kur policia greke, teksa punonte me DEA-n amerikane, e akuzonte se kishte transportuar 700 kilogramë kanabis në Greqi. Ai shumë shpejt nisi arratinë”, shkruan “Reuters”.