Këshilli i Emërimeve në Drejtësi ka nisur punën për të rikthyer normalitetin në Gjykatën Kushtetuese. Dje KED, me praninë e të gjithë anëtarëve, anëtarëve zëvendësues, subjekteve që ftohen sipas ligjit dhe të përfaqësuesve të EURALIUS dhe OPDAT, zhvilloi mbledhjen e tij të parë, ndërsa u morën një sërë vendimesh të rëndësishme. Përmes një njoftimi për mediat, KED bëri me dije se në mbledhjen e djeshme është marrë vendimi për të nisur verifikimin e kandidatëve për Gjykatën Kushtetuese dhe Inspektorin e Drejtësisë, duke i dhënë kështu fund ngërçeve të krijuar në sistemin e drejtësisë. “KED vlerësoi se me konstituimin e tij, menjëherë duhet të angazhohet për të përmbushur të gjitha kompetencat dhe detyrimet që i ngarkon Kushtetuta dhe ligji, të cilat janë unike dhe të pazëvendësueshme lidhur me verifikimin, vlerësimin dhe renditjen e kandidatëve për pozicionet vakante tashmë të krijuara për gjyqtarë në Gjykatën Kushtetuese dhe Inspektor të Lartë të Drejtësisë, në mënyrë që organet e tjera kushtetuese të emërimit apo zgjedhjes të kenë mundësinë për të ushtruar kompetencat e tyre. Për këto arsye, duke respektuar kërkesat e ligjit, KED angazhohet që menjëherë të punojë për hartimin e Rregullores së Brendshme të KED. Miratimi i kësaj Rregulloreje përbën dhe hapin e nevojshëm ligjor për të vijuar, menjëherë, me përgatitjen në një afat të shkurtër të akteve nënligjore të përcaktuara nga ligji lidhur me shortimin e relatorëve, verifikimin dhe vlerësimin e kandidaturave të paraqitura për pozicionet vakante në Gjykatën Kushtetuese dhe për ILD”, thuhet në njoftim. Mirëpo, me këtë vendim të KED, i hapet rruga ngritjes së Gjykatës Kushtetuese. Kështu që me ngritjen e këtij institucioni, pritet që të marrë fund edhe konflikti Qeveri-Presidencë për dekretet.
Rritje personeli
Këshilli i Emërimeve në Drejtësi në njoftimin e tij deklaroi se ka mungesë burimesh njerëzore për vlerësimin e kandidaturave për plotësimin e vendeve vakante në Gjykatën Kushtetuese dhe për ILD. Për këtë arsye, KED kërkoi shtim personeli për Gjykatën e Lartë. “Gjithashtu, KED shqyrtoi dhe vlerësoi ngarkesën e pazakontë të punës dhe të angazhimeve që kërkohet për verifikimin dhe vlerësimin e kandidaturave për plotësimin e vendeve vakante në këto organe kushtetuese. Deri më tani, për të gjitha pozicionet vakante, janë kandiduar 40 magjistratë dhe jomagjistratë, të cilët, njëkohësisht, sipas rastit, duhen verifikuar dhe/ose vlerësuar nga KED. Paraprakisht duke vlerësuar mbështetjen e deritanishme të Gjykatës së Lartë, me të gjitha burimet dhe mundësitë e saj, për shkak të kësaj ngarkese të pazakontë, krahas shprehjes së vullnetit unanim për të punuar, sipas ligjit dhe sa më shpejt, me të gjitha kapacitetet e tij, KED vlerësoi se është e domosdoshme të shtohet personeli administrativ i Gjykatës së Lartë në dispozicion të veprimtarive të këtij Këshilli”, thuhet në njoftim.
BE rrit monitorimin
Reforma në drejtësi dhe institucionet e dala prej saj vijojnë të jenë nën monitorimin e ndërkombëtarëve, të cilët e mbështesin fuqishëm. Garancinë e ka dhënë dje ambasadori i BE në Tiranë, Luigji Soreca, i cili ka zhvilluar një takim me Këshillin e Emërimeve në Drejtësi. Përmes një statusi në rrjetet sociale, Soreca deklaroi se BE mbështet procesin për përzgjedhjen e anëtarëve të Gjykatës Kushtetuese. “Takimi i parë sot i Këshillit të Emërimeve në Drejtësi. Ky është një hap tjetër i rëndësishëm në zbatimin e reformës së drejtësisë në Shqipëri. BE-ja e mbështet punën e tij dhe detyrën vendimtare të klasifikimit të kandidatëve për Gjykatën Kushtetuese. BE për Shqipërinë”, deklaroi Soreca.
Rigels Seliman