Komisioni i Pavarur i Kualifikimit zbardhi ditën e djeshme vendimin e plotë të shkarkimit të ish-prokurorit të Prokurorisë së Përgjithshme, Artur Selmani. Selmani u përball pak kohë më parë me procesin e vetingut, por nuk e kaloi me sukses këtë sfidë, ndërsa KPK sqaroi dje gjerësisht të gjitha arsyet që e çuan drejt vendimit të shkarkimit. Ajo që bie në sy nga vendimi i komisionit të vetingut është fakti se një nga pikat që e fundosi Selmanin është edhe shuma e parave e fituar nga bastet sportive.
“Mbështetur në informacione të marra nga burime të tjera si dhe kriteret e vlerësimit të parashikuara në ligjin për statusin e gjyqtarëve dhe prokurorëve si dhe në këndvështrimin e përgjithshëm të etikës dhe angazhimit ndaj vlerave profesionale, të një prokurori, dhe vlerat themelore se sjelljet e prokurorit gjatë ushtrimit të funksionit dhe jashtë tij duhet të garantojnë ruajtjen dhe forcimin e besimit të publikut tek sistemi i drejtësisë. Me faktin e pranuar dhe nga vetë subjekti i rivlerësimit se ai ka qenë i përfshirë për 3 vite rresht në lotari sportive, ku ka fituar rreth 10.000 USD, dhe faktin që këto lotari sportive krijojnë varësi, pasi jo gjithmonë fiton por dhe humb, këto lloj sjelljesh apo përfshirjesh të subjektit të rivlerësimit kanë cenuar, figurën dhe integritetin e tij, si dhe kanë ulur shkallën e besueshmërisë nga publiku”, shprehet në vendimin e zbardhur trupa gjykuese. Artur Selmani kishte edhe probleme të shumta me pasurinë, të cilat e penalizuan para KPK.
“Subjekti i rivlerësimit ka mungesë të dokumentacionit ligjor justifikues për të provuar se motra e tij, znj. T.S., ka pasur të ardhura nga burime të ligjshme për të blerë dhuratën në shumën prej 950.50 eurosh;subjekti rivlerësimit ka mungesë të dokumentacionit ligjor justifikues për të vërtetuar këto të ardhura nga lotaritë sportive në shumën prej 10.000 USD fituar gjatë viteve 2006 – 2008, të ardhura që kishin shërbyer si burim për krijimin e depozitës dhe gjendjes cash, deklaruar në deklaratën “Veting” të vitit 2017. Subjekti i rivlerësimit ka mungesë të dokumentacioni ligjor justifikues për burimin e krijimit të depozitës në shumën prej 2.500.000 lekësh në “Credins Bank” dhe gjendjen cash në shumë prej 950 000 lekësh”, thuhet në vendimin e KPK.