Kryeministri Edi Rama dhe ministri i kosovar i Transporteve, Fatmir Limaj kanë inauguruar ditën e djeshme doganën e Kosovës në portin e Durrësit. Ky vendim vjen pas disa takimeve dhe firmosjes së disa marrëveshjeve mes dy qeverive, asaj të Shqipërisë dhe të Kosovës vitin e kaluar në Pejë. Kryeministri Rama nga Porti i Durrësit, duke folur për inaugurimin dhe hapjen e pikës doganore të Kosovës, deklaroi se kjo do të ndihmojë shumë sipërmarrës nga të dyja vendet dhe e gjitha kjo do kthejë kufirin në informal.
“Më vjen shumë mirë që mblidhemi në një stacion tjetër për të çelur zyrën doganore të Kosovës në Durrës dhe për ta kthyer kështu Portin e Durrësit jo vetëm një doganë për Shqipërinë, por edhe për Kosovën. Dogana e saj këtu në Durrës është pika e bashkimit doganor. Vazhdimi i këtij procesi me vendosjen me të njëjtin standard për të gjitha pikat doganore. Tani njohja reciproke, mundësi e kryerjes së procedurave doganore përmes teknologjisë dhje realizimit të qëllimit të administratës, i cili ka dy krah apo dy koka dhe funksionon si një trup i vetëm. Ma ha mendja se kjo përbën një lajm shumë të rëndësishëm për të gjithë tregtarët. Kjo e kthen kufirin mes Kosovës dhe Shqipëri në informal. Kështu në hyjmë një proces , që na çon jo vetëm në bashkëpunim doganor”, deklaroi ai.
Ndërkohë, nga ana tjetër kryeministri Edi Rama deklaroi se hapi i radhës mes dy vendeve do të jetë një kufi i unifikuar, i cili pritet të realizohet në pranverë. Në këtë kontekst, i pari i qeverisë theksoi se në pranverë kufiri Shqipëri-Kosovë, do jetë si kufiri Francë-Gjermani, pra pa barriera.
“Jo më larg se dje, Ministria jonë e Brendshme ka përfunduar të gjithë draftin teknik, në bashkëpunim me Ministrinë e Brendshme të Kosovës. Tani drafti do të shkojë në ministritë e tjera, për të hyrë në një proces ligjor dhe për të garantuar që në pranverë, ne të kemi në kufirin e sotëm që ndan Tiranën me Prishtinën, një sistem krejt të ri, sistemin Shengen. Që do të thotë se tani jemi vetëm në një fazë fillestare, kemi kaluar nga dy kontrolle në një kontroll të unifikuar, zyra e policisë në kufi është zyrë e përbashkët, ku punonjësit e policisë së Kosovës dhe Shqipërisë qëndrojnë në një sportel, por kjo do të zgjasë edhe për pak kohë vetëm si procedurë, sepse në pranverë do të kemi një procedurë krejt tjetër dhe do të kemi një kufi totalisht fluid, njësoj si kufiri mes Francës dhe Gjermanisë, apo mes Italisë dhe Zvicrës e kështu me radhë”, nënvizoi kryeministri Edi Rama.