Procesi i vetingut shtoi goditjet në radhët e gjyqtarëve dhe prokurorëve ditën e djeshme. Teksa pak nga pak po mbushet një vit që nga seanca e parë dëgjimore, të shumtë janë emrat që janë shkarkuar nga Komisioni i Pavarur i Kualifikimit. Po ashtu, kohët e fundit është vënë re se KPK po kalon në sitë krerë gjykatash, nga ku deri tani ka rezultuar se pjesa më e madhe janë shkarkuar. Të njëjtin fat pësoi dje edhe kryetari i Gjykatës së Kurbinit, Alfred Gjoni. “Komisioni i Pavarur i Kualifikimit njofton se, pas shqyrtimit të dokumentacionit dhe zhvillimit të seancës dëgjimore më datë 09.01.2019 për subjektin e rivlerësimit, z. Alfred Gjoni, bazuar në ligjin nr. 84/2016, sot, më datë 14.01.2019 vendosi: Shkarkimin nga detyra të subjektit të rivlerësimit, Alfred Gjoni, kryetar i Gjykatës së Rrethit Kurbin”, njoftoi KPK. Në këtë mënyrë numri i krerëve të gjykatave të shkarkuar nga detyra vajti në 9, nga 13 që kanë kaluar deri tani në sitë. Kujtojmë që gjatë seancës dëgjimore trupa gjykuese i renditi një sërë problemesh me pasurinë dhe aftësitë profesionale Gjonit. Sipas relatorit të çështjes, Gjoni kishte përdorur pa deklaruar tre makina. Atij iu gjetën probleme me një shtëpi të blerë në 2001. Kësaj pasurie rreth 60 metra katrorë i ishte bërë një shtesë 47 metra. Sipas relatorit, çmimi i blerjes së shtëpisë në vitin 2001 ishte më i ulët se çmimi sipas Entit Kombëtar të Banesave, ndërsa ka paqartësi edhe për një shtesë në vitin 2013. KPK po ashtu tha se kishte gjetur probleme sa i përket likuiditeteve në para të gjykatësit, ndërsa shtoi se Gjoni nuk kishte provuar me dokumente një ndihmë financiare të marrë nga babai dhe vëllai. Probleme po ashtu u vunë në dukje edhe në lidhje me një apartament në përdorim nga Gjoni në qytetin e Durrësit. “Gjatë shqyrtimit të aftësive profesionale u gjetën 6 dosje me zvarritje tej afateve normale. Një çështje është zvarritur për katër vjet. 3 çështje të tjera janë gjetur me vendime të paplota”, tha relatori.
Alma Muça rikonfirmohet në detyrë
Dita e djeshme ishte ditë vendimesh për Komisionin e Pavarur të Kualifikimit, i cili pas shkarkimit të Alfred Gjonit, i dha një lajm të mirë prokurores së Prokurorisë së Përgjithshme, Alma Muça. Kjo e fundit u rikonfirmua në detyrë pasi gjatë seancës dëgjimore nuk rezultoi me probleme. Alma Muça është prokurorja që pezulloi nga detyra ish-kryeprokurori Adriatik Llalla për rastin e 3 të akuzuarve për vrasje të trefishtë në Vlorë. Trupa gjykuese u shpreh se gjatë hetimit për këtë çështje ishte fokusuar kryesisht te roli i prokurores si drejtuese e Drejtorisë Gjyqësore në lidhje me përfaqësimin e akuzës ndaj tre të akuzuarve në Gjykatën e Lartë. Në seancë, Muça pranoi se kishte biseduar me prokurorin e çështjes si kolegë, por tha se edhe nëse do i ishte kërkuar mendim me shkrim, udhëzimi i saj do kishte pasur vetëm vlerë këshille dhe nuk ishte detyrues për prokurorin e çështjes. Në lidhje me këtë rast ndërhyri edhe vëzhguesja ndërkombëtare. Ajo kërkoi të dinte nga prokurorja nëse kishte pasur mundësi dhe nëse e kishte raportuar këtë çështje te Prokurori i Përgjithshëm në momentin që kishte marrë dijeni, por prokurorja e mohoi diçka të tillë. Ajo argumentoi se nuk e njihte fare dosjen dhe nuk ishte informuar zyrtarisht për të. Sa i takon kriterit të pasurisë dhe integritetit të figurës, Alma Muçës nuk iu konstatuan probleme.
Mimoza Ibra