Avokati Spartak Ngjela sulmoi dje ashpër Presidentin e Republikës, Ilir Meta. Në një intervistë televizive, ai deklaroi se kompetencat e Metës si president janë formale, duke theksuar se nuk ka të drejtë të kthejë ministrat e propozuar nga kryeministri. “Sipas doktrinave kushtetuese, Meta nuk mund ta refuzojë emërimin e një ministri. Presidenti ka kompetencë formale dhe jo substanciale. Dallimi midis këtyre dy kompetencave është fakti se substancialja është ajo ku presidenti tregon vullnetin e tij. Kurse kjo tjetra jo, është vullnet i tjetrit, është thjesht një firmë. Meta nuk mund të thotë jo sepse me këtë logjikë, nëse ai ka të drejtë të mos firmosë një ministër, atëherë ai ka të drejtë të mos firmosë as kryeministrin. Pra e ka vetëm formale. Tek kjo çështje, përgjegjësinë e ka presidenti. Fakti që e ka marrë presidenti tregon që ka diçka brenda. Mund të jetë politika amerikane që ia ka kërkuar, etj, gjëra që ne nuk i dimë. Ne dimë që presidenti ka marrë një vendim me ngërç kushtetues sepse kompetencat i ka vetëm formale”, tha ai. Sipas avokatit, rasti i ministrit të Jashtëm është i ngjashëm me atë të ministrit të Brendshëm. Ngjela u shpreh se njësoj si me Sandër Lleshajn, Meta mund ta dekretojë pak më vonë Gent Cakën. “Një herë, në rastin e ministrit të Brendshëm, operoi me vonim. Ka edhe këtu një lojë si ajo çështja me ministrin e Brendshëm se atij i tha nuk ke ikur si gjeneral, ndërsa këtij i tha nuk ke certifikatën e sigurisë. Por ky e ka marrë atë në datën 4, ndërsa Rama ia ka dërguar kërkesën më parë. Tani nuk është çudi t’i thotë Ramës shtro kërkesë tjetër. Duhet të kemi kohë të durojmë”, tha Spartak Ngjela. Në vijim të fjalës së tij, ai e akuzoi Metën si njeri të lidhur me Gruevskin.
“Duke qenë ky shqiptar i Kosovës, unë mendova se lëvizte Meta sepse edhe Meta me Gruevskin ka qenë. I Gruevskit është, Gruevski një tip Millosheviçi është. Çfarë tjetër mund të prisja unë nga Meta? Deri dje këtë mendim kam patur. Por sot mora informacione që ky ka deklaruar që ky është për ndërrim për territoresh. Ai është në atë rrethin për ndërrim territoresh”, deklaroi avokati Spartak Ngjela.