Ashpërsohen marrëdhëniet mes Presidenti Ilir Meta dhe kryeministrit Edi Rama. Refuzimi i Vitore Tushës për kryetare të KLSH dhe bllokimi i Sandër Lleshajt nga Meta, kanë shkaktuar tensione të forta mes tyre. Por edhe pse në publik Meta e Rama janë të moderuar, në të vërtetë mes tyre ka nisur një luftë në distancë. Fakti që Meta po mban pezull ministrin e Jashtëm, është një fakt. Por fakti tjetër është se kreu i shtetit po bllokon të gjitha nismat e qeverisë. Gazeta publikoi pak ditë më parë se si Meta kaloi në heshtje të gjithë paketën fiskale, e miratuar në kuadër të ndryshimeve në buxhet. Por ai ka kaluar në heshtje dhe një tjetër ligj. Bëhet fjalë për ligjin “Për disa ndryshime dhe shtesa në ligjin nr. 9049, datë 10.4.2003, “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, të ndryshuar”. Ligji në fjalë u miratua në fund të vitit që lamë pas dhe përmes tij thjeshtohen procedurat e verifikimit të pasurisë për zyrtarët e lartë. Përmes tij, ILDKP detyrohet që të publikojë online deklaratat, ndërsa bankat dhe institucionet e tjera duhet të mos krijojnë asnjë pengesë në dhënien e informacionit. Por dje ligji është publikuar në Fletoren Zyrtare dhe nuk ka dekret presidenti. Pra Meta e ka kaluar atë në heshtje. Që pas replikave për Sandër Lleshajn, Meta nisi goditjet në distancë ndaj Ramës. Ai ktheu për rishqyrtim buxhetin dhe nismën e qeverisë për uljen e dividentit. Ndërsa tani ka kaluar në heshtje një tjetër ligj, duke konfirmuar se tensionet janë shtuar ndjeshëm.
Bilancet e Metës
Gazeta ka bërë një përmbledhje të përplasjeve Qeveri-Presidencë dhe rezulton se Ilir Meta ka ecur në gjurmët e paraardhësit të tij, Bujar Nishani. Kjo pasi në një vit e gjysmë të Presidencës së tij, Ilir Meta ka thyer rekordin e Nishanit, duke bllokuar plot 9 nisma të qeverisë. Sipas përllogaritjeve të gazetës, tregues i përplasjeve Rama-Meta janë kthimi mbrapsht i 6 ligjeve që mazhoranca i ka dërguar Presidentit për t’i dekretuar. Dy prej tyre kanë të bëjnë me teatrin, pasi Meta ktheu dy herë nismën për shembjen e godinës, siç është ligji për projektimin dhe realizimin e projektit urban dhe godinës së re të Teatrit Kombëtar. Ligji tjetër që Meta ka kthyer mbrapsht është ligji për disa ndryshime për tatimin mbi të ardhurat për lojërat e fatit. Ndërsa një tjetër ligj që nuk ka marrë “bekimin” e Metës duke mos u dekretuar është ai për tarifat gjyqësore. Ndërkohë që më tej kreu i shtetit i ka kthyer mbrapsht qeverisë për rishqyrtim ligjin për buxhetin e vitit 2019. Ndërsa ligji i gjashtë, që Meta i ka kthyer mbrapsht qeverisë ka të bëjë me ligjin për disa ndryshime për tatimin mbi të ardhurat për dividentin. Pra të gjitha, këto lëvizje të kreut të shtetit, i cili i ka kthyer mazhorancës plot gjashte ligje duke mos ia dekretuar, tregojnë qartë se Ilir Meta ka thyer rekord e Bujar Nishanit. Kjo pasi ky i fundit edhe pse Bujar Nishani ishte një President i emëruar në atë post nga opozita e sotme, brenda një vit i ktheu qeverisë vetëm 2 ligje. Megjithatë, edhe mazhoranca e sotme nuk është kursyer ndaj Metës, pasi të gjithë ligjet që Presidenti i ka kthyer, ia ka rrëzuar, ndërsa po ashtu i rrëzoi edhe kandidaturën e zonjash Vitore Tusha për në krye të KLSH. Ndërkohë që mazhoranca i ka marrë për rishqyrtim Metës vetëm ligjin për projektimin dhe realizimin e projektit urban dhe godinës së re të Teatrit Kombëtar.
Kliti Topalli