Komisioni i Pavarur i Kualifikimit i ka dhënë një tjetër goditje gjyqtarëve dhe prokurorëve të korruptuar, duke treguar se është i vendosur për të pastruar sistemin e drejtësisë. Ditën e djeshme KPK vendosi të shkarkojë nga detyra kryetarin e Gjykatës së Sarandës, Alltun Çela. Trupa gjykuese e përbërë nga Pamela Qirko, Xhensila Pine dhe Genta Tafa Bungo gjatë kontrollit të figurës së tij, nxori probleme në të tre shtyllat e vlerësimit për gjyqtarin kryesisht me pasurinë, por probleme janë konstatuar edhe në integritetin e gjyqtarit dhe në aftësitë profesionale. Çela rezulton të këtë në pronësi një shtëpi banimi si dhe tokë are ullishtë, ku janë të mbjella mbi 50 rrënjë ullinj të vjetër si edhe 250 rrënjë ullinj e agrume. Në 1995-n, gjyqtari ka deklaruar se ka përshtatur për banim një ish-fabrikë biskotash, por për Komisionin e Pavarur të Kualifikimit është e paqartë se si subjekti e ka përshtatur për banim pa e siguruar pronësinë. Po ashtu, problematik u vlerësua edhe raporti i Drejtorisë së Sigurimit të Informacionit të Klasifikuar, i cili vlerëson se Alltun Çela është i papërshtatshëm për të qenë gjyqtar. Madje, në lidhje me aftësinë profesionale, Komisioni zbuloi edhe mënyrën sesi Çela abuzonte me detyrën. Kreu i Gjykatës së Sarandës prej një dekade nuk i respektonte, duke i nisur me nga 4 orë vonesë ose më herët para orarit të caktuar duke sjellë dështimin e gjyqeve. “Për subjektin janë dorëzuar 11 denoncime nga qytetarët. Nga shqyrtimi i dosjeve u konstatua se nuk respekton oraret. Ai i vazhdonte seancat gjyqësore jashtë orarit të përcaktuar, me vonesa nga 4 minuta deri në 5 orë dhe përpara afatit nga 7 deri 20 minuta”, deklaroi pak ditë më parë KPK. Por pas raporteve nga KPK, reagoi edhe kryegjyqtari i Sarandës, i cili kërkoi që DSIK të japë prova që është i papërshtatshëm dhe të mos i referohet letrave. “Se kuptoj si DSIK më nxjerr të papërshtatshëm me letra anonime. Të nxjerrë një prove të vetme DSIK e unë jap dorëheqjen”, deklaroi Çela. Alltun Çela drejtonte Gjykatën e Sarandës prej vitit 2008, ndërsa u rikonfirmua në këtë detyrë edhe në vitin 2014. Kështu, me shkarkimin e Çelës, shkon në 8 numri i kryetarëve të gjykatave të shkarkuar, ndërkohë që KLGJ ka nisur komandimet e nënkryetarëve për të drejtuar gjykatat.
Konfirmohet dënimi i Thanzës
Ish-gjyqtari Admir Thanza rezulton i dënuar për vjedhje në Itali. Ky fakt është konfirmuar nga letërporosia e ardhur nga shtetit fqinj, në llogari të Thanzës. Fillimisht ka qënë Operacioni Ndërkombëtar i Monitorimit, i cili zbuloi gjatë procesit të vetingut që Admir Thanza, ish-gjyqtari i Gjykatës Kushtetuese dhe gjyqtar i Gjykatës së Lartë ishte i dënuar për vjedhje. Madje, këtë fakt edhe Thanza e ka pranuar kur e kanë pyetur në prokurori. Por tashmë pritet prokuroria që të vendos për dërgimin e çështjes në gjyq me akuzën e falsifikimit të falsifikimit të formularit të dekriminalizimit. Në formularin e dekriminalizimit Thanza nuk kishte deklaruar dënimin. Admir Thanza ishte dënuar në Itali me 40 ditë burg për vjedhje në bashkëpunim në vitin 1999, kohë në të cilën ishte dhe gjyqtar në Gjykatën e Shkodrës. Thanza nuk e kishte deklaruar në formular këtë dënim, por për rastin, përpara anëtarëve të KPK-së tha se vjedhjen e kishte kryer kunata e tij, por ai e mori përsipër për të ndihmuar nipin e tij të sëmurë që po kurohej në Itali, pasi vuante nga një sëmundje e rëndë.
Rigels Seliman