Kryeministri Edi Rama ka paralajmëruar dje se pjesë e reformës në universitet do të jetë edhe reduktimi i studentëve. Gjatë një vizite në Marikaj të Vlorës, ku pa nga afër banesën e re për familjen e Ilir Kocit, Rama u ndal te shqetësimet e studentëve. Sipas tij duhet t’i jepet më tepër prioritet arsimit profesional. “Ne tani do shtojmë edhe shkollat profesionale, kolegje profesionale sepse nuk ka kuptim që të shkojnë kaq shumë në universitet dhe pastaj ngelen rrugëve. Të shkojnë në universitet më pak, por të tjerët të shkojnë në shkolla profesionale që të marrin një zanat. Të shkojnë në kolegje profesionale pas shkollës së mesme”, ka deklaruar Rama. Kreu i ekzekutivit ka premtuar se qeveria do të përqendrohet edhe në familje të tjera që janë në nevojë, të cilat janë të regjistruara. Rama ka thënë se mbështetja do të jetë edhe për punën dhe shkollimin e fëmijëve të familjeve në nevojë.

“Nuk janë shumë familje në gjendjen që ishit ju, nga pikëpamja e gjendjes së shtëpisë por sidoqoftë janë disa, por ne i kemi regjistruar dhe do ti ndihmojmë të gjitha pak nga pak. Por pastaj është puna dhe shkolla, nuk ka asgjë tjetër”, ka thënë ai. Kryeministri Edi Rama ka vlerësuar rezultatet e larta në mësime të fëmijëve të familjes Koci, ku i ka këshilluar të vazhdojnë po me të njëjtat rezultate, pasi do ju vlejë në të ardhmen. Kreu i ekzekutivit ju ka thënë fëmijëve që të vlerësojnë sakrificat e prindërve duke dalë sa më mirë me shkollën. “Tani si e kemi bisedën, jo mirë, tani vetëm dhjeta. Qiraja e shtëpisë paguhet vetëm me dhjeta, çdo dhjetë lan borxhin çdo dhjetë lan borxhin. Dhe borxhin e keni ndaj prindërve jo ndaj meje. Ca do fusësh në kokë sot do kesh nesër”, ka thënë Rama. Dy muaj më parë, kryeministri Edi Rama, së bashku me ministren e Shëndetësisë dhe Mbrojtjes Sociale, Ogerta Manastirliu panë nga afër kushtet e vështira në të cilat jetonte familja e Ilir Kocit, në Marikaj të Vorës, në një banesë të rrënuar ku pamundësia ekonomike e prindërve ua vështirësonte jetesën 6 anëtarëve të saj. Dy muaj më pas, familja Koci mori çelësat e një vile të re dykatëshe, me hapësira të bollshme për 4 fëmijët e rritur dhe e arreduar sipas kohës.