Departamenti Amerikan i Shtetit ia ka ndaluar hyrjen në SHBA, shtetasit serb Goran Radosavleviq i njohur si Guri, për shkak të përfshirjes së tij në shkelje të mëdha të drejtave të njeriut. Ky urdhër bazohet në informatat që Sekretari i Shteti i ka ndaj zyrtarëve të huaj që janë të përfshirë në afera korruptive e shkelje të drejtave të njeriut, ku me këtë rast i ndalohet hyrja në SHBA edhe familjarëve të tij – bashkëshortes Svetlana si dhe të bijës Ana. Ligji kërkon po ashtu që Sekretari i Shtetit të njoftoj publikisht ose edhe privatisht për këto vendime. “Sipas informatave të besueshme, Radosavleviç gjatë vitit 1999 ishte i përfshirë në vrasjen e vëllezërve Bytyqi, tre qytetarë amerikanë me prejardhje shqiptare të cilët u vranë në Serbi pas luftës në Kosovë”, thuhet në deklaratë. Goran Radosavleviç ka qenë komandant i xhandarmerisë serbe. Ndërkaq lidhur me vrasjen e tre vëllezërve Bytyqi, ai ishte marrë në pyetje nga gjykata e Serbisë. Njëri nga dëshmitarët kishte thënë në gjykatën e Negotinit në vitin 2017, por edhe më herët më 2014 dhe 2013, se në momentin kur janë ekzekutuar vëllezërit Bytyqi në vendin e ngjarjes ka qenë Goran Radosavleviç që asokohe ishte zyrtar i lartë i forcave speciale të policisë serbe. Vëllezërit Ilir, Agron dhe Mehmet Bytyqi ishin vrarë në korrik të vitit 1999 në Petrovo Sello në afërsi të Klladovës në pjesën lindore të Serbisë. Ndërkaq, trupat e tyre të pajetë ishin gjetur në qershor të vitit 2011 në varrezën masive pranë vendit ku ishin vrarë.