Kryeministri i Kosovës, Ramush Haradinaj ka fajësuar përsëri shefen e diplomacisë europiane Federica Mogherini për dështimin e dialogut me Serbinë.
Pas mbledhjes me qeverinë e Kosovës ai ka zbuluar sot edhe arsyen e nervozimit gjatë takimit të djeshëm me Federica Mogherinin në Bruksel, ndërsa shtoi se Kosova nuk do të jetë në mëshirën e të tjerëve.
“Kosova më nuk do të jetë në mëshirë të të tjerëve. Do të binden të gjithë që kjo puna e taksës jo vetëm që nuk ka me u heq, por do të konsolidohet dhe nuk do të ndryshojë deri në njohje të Kosovës. Është absurd me e heq”, tha Haradinaj.
Ndërsa nuk është ftuar në takimin që do të mbahet nesër në Bruksel, Haradinaj tha se mirëpret një gjë të tillë.
“Nuk më ka mbetur më punë që të jem aty. Unë i kam kryer ato çfarë kam pasur të them. Moghereni e ka çrregulluar dialogun, ka nxjerrë shumë probleme në rajon”, është shprehur ai.