Studentët e Fakultetit të Ekonomisë i dhanë ultimatum dje dekanit Dhori Kule për të përmirësuar gjendjen në fakultet. Gjatë një takimit të zhvilluar pasditen e djeshme, ata u shprehën se duhet të ketë punë konkrete në rregullimin e pikave problematike dhe jo vetëm fjalë. “Duam punë konkrete, përgjigje konkrete”, deklaruan studentët. Takimi i tyre me Dhori Kulen erdhi pas kërkesës së studentëve për shkarkimin e tij. Edhe gjatë takimit të rinjtë e akuzuan Kulen për keqmenaxhim dhe abuzime në fakultet e për këtë arsye kërkuan sërish dorëheqjen e tij. Për të justifikuar veten e tij para studentëve dhe për të hedhur poshtë akuzat e ngritura ndaj tij, Dhori Kule deklaroi se rekrutimet dhe punësimet Fakultetin e Ekonomisë bëhen në mënyrë të rregullt.
“Akuzat për plagjiaturë nuk janë fakte. Transparenca e fondeve që kam në administrim, që nesër i bëjmë publike. Rekrutimet bëhen në mënyrë të rregullt”, tha Kule. Por studentët këmbëngulën që dekani të mos i shmanget përgjegjësisë, ndërsa e paralajmëruan se do ta detyrojnë të japë dorëheqjen nëse nuk i realizon premtimet e bëra para tyre. Disa studentë u ankuan për diplomat që nuk njihen për shkak të akreditimit e për infrastrukturën e papërshtatshme në fakultet, mungesën e kushteve në klasa dhe auditore, ndërsa të tjerë i kërkuan transparencë financiare. Kurse studentët e ekselencës u ankuan se nuk marrin bursat. Për zgjidhjen e problematikave, ata i lanë afat deri ditën e sotme Dhori Kules. “Nëse nuk i realizon nesër ato që the, jep dorëheqjen”, u shprehën studentët. Sakaq, grupi protestues i të rinjve paralajmëroi për përshkallëzim të protestës. “Kemi vendosur të marrim situatën në dorë, duke bllokuar rrugët dhe duke bërë mosbindje civile. Kemi vendosur që të mos bëhemi ende të dhunshëm pasi besojmë se kërkesat tona do të realizohen. Nëse kërkesat tona nuk plotësohen do të ketë përshkallëzim të protestës e cila mund të shkojë edhe në dhunë”, tha një student. Ndërsa një protestues tjetër akuzoi kryeministrin Edi Rama se po tenton t’i përçajë. “Deri tani ne nuk kemi besim tek Rama sepse ai është treguar arrogant për kauzën tonë, ne presim vendime”, tha një tjetër student.