Postuar: 18/12/2018 – 07:41
Komisioni i Ligjeve ka miratuar dje në parim, nen për nen dhe në tërësi projektligjin “Për statusin e dëshmorit të atdheut”. Relator për komisionin ishte deputeti i Partisë Socialiste, Spartak Braho, ndërsa i pranishëm për prezantimin e nismës ishte zëvendësministri i Mbrojtjes, Petro Koçi. Gjatë fjalës së tij, Koçi deklaroi se objekt i këtij ligji është përcaktimi i kritereve dhe procedurës për shpalljen ose njohjen e statusit “Dëshmor i Atdheut” si dhe të drejtat e përfitimet që rrjedhin nga ky status. Mes të tjerash, numri dy i Mbrojtjes bëri me dije se statusin “Dëshmor i Atdheut” do ta marrin 4 të vrarët e ngjarjes së “21 janarit” si dhe një sërë kategorish të tjera siç janë personat që vriten duke mbrojtur pronën apo votat.
“Qëllimi i ligjit është shpallja ose njohja e statusit “Dëshmor i Atdheut” për personat, të cilët me akte të rralla patriotizmi, vetëmohimi dhe heroizmi të jashtëzakonshëm kontribuan në luftën për liri, pavarësi dhe çlirim kombëtar të Shqipërisë, deri në dhënien e jetës, si dhe për personat, të cilët kanë dhënë e japin jetën për mbrojtjen e integritetit territorial, të interesave kombëtare shqiptare, në luftën kundër terrorizmit dhe krimit ndaj jetës së individit, mbrojtjen e pronës publike si dhe në raste fatkeqësish natyrore, në ndihmë të popullsisë”, deklaroi zëvendësministri i Mbrojtjes, Petro Koçi. Ndërkohë që në projektligj, më konkretisht në nenin 5 bëhen të ditura edhe kriteret për shpalljen ose njohjen e statusit “Dëshmor i Atdheut”.
“Dëshmorë të Atdheut shpallen ose u njihet statusi, si të tillë,: a) personat, të cilët kanë humbur jetën për lirinë, pavarësinë kombëtare dhe mbrojtjen e territoreve shqiptare apo në përpjekje për mësimin dhe përhapjen e gjuhës shqipe para datës 28 nëntor 1912;b) shtetasit shqiptarë e të huaj, të cilët kanë rënë në luftë për mbrojtjen e integritetit territorial, të lirisë e pavarësisë së Shqipërisë, si dhe për arsye të kundërshtimit të pushtimit të trojeve shqiptare nga ushtritë e huaja dhe të qëllimeve shoviniste të tyre, nga data 28 nëntor 1912 deri më 7 prill 1939; c) shtetasit shqiptarë, të cilët kanë humbur jetën në mbrojtje të vlerave kombëtare e patriotike të kombit shqiptar para datës 7 prill 1939; ç) shtetasit shqiptarë, të cilët kanë marrë pjesë me armë në dorë ose në formë të organizuar në Luftën Antifashiste Nacionalçlirimtare dhe kanë rënë duke luftuar kundër pushtuesve nazifashistë e bashkëpunëtorëve të tyre, nga data 7 prill 1939 deri më 9 maj 1945”,thuhet në projektligj.