Ligji për të futur në një regjim të posaçëm të burgosurit e dënuar për pjesëmarrje në grup të strukturuar kriminal, për aktivitete terroriste, dhe të tjera krime si këto përplasi dje Komisionin e Sigurisë dhe Ministrinë e Drejtësisë. Pak ditë më parë ky ligj që përcakton rregulla të veçanta për telefonatat dhe takimet e target-grupeve të mësipërme shkoi në Kuvend dhe u mor në shqyrtim nga Komisioni i Ligjeve, ku e ftuar ishte edhe Etilda Gjonaj. Gjatë fjalës së saj, Gjonaj deklaroi se ndryshimi në ligj po bëhej sepse ka indicie që disa të burgosur të sigurisë së lartë vijojnë aktivitetin e tyre kriminal edhe brenda hekurave. Por sipas propozimit të Ministrisë së Drejtësisë, përmes ligjit të ri të gjithë të burgosurit e sigurisë së lartë futen në regjim të posaçëm një-vjeçar, edhe nëse ai nuk merret më me punë kriminale. Një gjë e tillë u kundërshtua dje nga Komisioni i Sigurisë, i cili diskutoi nen për nen ndryshimin në ligj. Kryetarja komisionit, Ermonela Felaj deklaroi se ndryshimi ligjor nuk mund të prekë çdo të burgosur të sigurisë së lartë sepse në këtë rast shkelen të drejtat e njeriut. “Të dënuarit në burgjet e sigurisë së lartë që janë dënuar për veprat për pjesëmarrje në grup të strukturuar kriminal, vepra terroriste, etj, mund të vendosen në regjim të posaçëm. Sipas variantit të Ministrisë së Drejtësisë, do na rezultonte që të gjithë të dënuarit do të kalonin në regjim të posaçëm. Por regjimi i posaçëm është një rrethanë e jashtëzakonshme, prandaj ne e kemi ndarë që në regjime të posaçme do të vihen vetëm ata për të cilët ka të dhëna që vijojnë aktivitetin kriminal edhe brenda burgut”, u shpreh Ermonela Felaj.
Diskutimet
Ky propozim i saj u votua nga të gjithë anëtarët e Komisionit të Sigurisë, por Xhemal Qefalia ngriti si shqetësim vendosjen në regjim të posaçëm edhe të të paraburgosurve. Sipas tij, edhe në këtë rast shkelen të drejtat e njeriut sepse për të paraburgosurit nuk është shprehur akoma gjykata me vendim. Megjithatë, Felaj argumentoi se edhe tek të paraburgosurit qëndron frika se mund të vijojnë aktivitetin kriminal. Ajo shtoi senë këtë rast ndalimi i aktiviteteve kriminale qëndron mbi pikën e zbatimit të të drejtave të njeriut. Felaj po ashtu theksoi se përmes këtij ndryshimi në ligj synimi dhe objektivi kryesor është thellimi i luftës kundër krimit të organizuar dhe korrupsionit. “Rreziku që edhe një i paraburgosur të vijojë punën e tij me jashtë ekziston, qëndron rreziku i implikimit. Ne po bëjmë ndryshe nga sa ka propozuar Ministria e Drejtësisë. Nëse ka arsye që ti të shkosh në regjim të posaçëm, patjetër që do të shkosh. Kjo mund të cenojë edhe të drejta, por është i nevojshëm. Ne e bëjmë këtë për të thelluar luftën kundër korrupsionit dhe krimit të organizuar”, u shpreh Ermonela Felaj.
Detajet
Në vijim të mbledhjes së Komisionit të Sigurisë, kryetarja Felaj sqaroi edhe se kush vendos që një i burgosur ose i paraburgosur të futet në regjim të posaçëm. Duke theksuar se në këtë pikë është mbështetur varianti i Euralius, Felaj tha se vendimi merret nga Ministria e Drejtësisë, në bashkëpunim me SPAK, Drejtorinë e Përgjithshme të Policisë së Shtetit dhe Drejtorinë e Përgjithshme të Burgjeve. “Ministri i Drejtësisë nuk mund të marrë vendim i vetëm. Ne kemi hequr ministrin e Brendshëm për të mos politizuar këtë çështje sepse dalin dy ministra, ndërsa vendosëm drejtorin e Policisë së Shtetit sepse edhe ai ka informacion. Kemi bërë pjesë edhe prokurorinë e posaçme, pra SPAK që do ta kemi gati shumë shpejt”, deklaroi ajo. Gjatë diskutimeve u nënvizua gjithashtu se Ministria e Drejtësisë do të detyrohet që pas një viti kur të ketë mbaruar regjimi i posaçëm, të marrë në konsideratë nëse do të revokohet vendimi ose jo.
Mimoza Ibra