Kolegji i Posaçëm i Apelimit nuk ka akoma një vendim për gjyqtarin e Gjykatës së Lartë, Edmond Islamaj. Ditën e djeshme u zhvillua seanca e radhës dëgjimore për Islamajn, për të cilin Komisioneri Publik ka kërkuar shkarkim. Pak ditë më parë KPA vendosi rihetim për disa nga pasuritë e Edmond Islamajt, por Komisioneri Publik dje nuk u shfaq fort me punën e kryer për subjektin e rivlerësimit. Sipas komisionerit, Kolegji i Posaçëm i Apelimit nuk e ka pyetur në lidhje me provat që ata si ankues kërkonin të merrnin, ndërsa shtoi se nuk ishte bërë e ditur as se për kë prej çështjeve KPA kishte vendosur të hetonte më shumë.
“Vetëm për disa prej çështjeve të ankimit, Kolegji pranoi të merrte prova, por nuk na u bë e ditur, se për kë prej çështjeve. Komisioneri vetëm sot u njoh me provat dhe çështjet, ndërsa nuk iu kërkua mendim në lidhje me provat që kërkohen nga ne si ankues të vendimit”, deklaroi Komisioneri Publik gjatë seancës së djeshme. Duke theksuar se i qëndronte ankimimit fillestar, Komisioneri Publik kërkoi hetim edhe për disa pika të tjera. Për pasurinë tokë kullotë në Karpen të Kavajës, sipas Komisionerit, KPA, ka hetuar vetëm për një nga pikat e kërkuara, atë të historikut të kalimit të pronës nga shtet në provat dhe deri në momentin e blerjes nga ana e gjyqtarit. Ai kërkoi që të ketë hetim edhe për çmimin e pronës. Një tjetër pasuri për të cilën Komisioneri Publik u shfaq i pakënaqur me hetimin dhe kërkoi të kryhen procedura më të thelluara ishte edhe ajo e bashkëshortes dhe fëmijëve të gjyqtarit të Lartë. Komisioneri Publik u shpreh para trupës gjykuese se një hetim më i thelluar duhet edhe për shitjen e një makine nga ana e bashkëshortes. Për këtë të fundit, Edmond Islamaj nuk disponon dokumentacion për të provuar të ardhurat nga shitja, pasi sipas tij, kalimi i shumës monetare, nuk është bërë nëpërmjet sistemit bankar. Ndërkohë, për të dhënë shpjegime më të detajuara në lidhje me këtë shitje, gjyqtarit iu dha më shumë kohë nga Kolegji i Posaçëm i Apelimit, i cili shtyu seancën për në datën 20 dhjetor. Po ashtu, KPA rrëzoi kërkesën e Komisionerit Publik, për të marrë prova të tjera, duke i konsideruar të panevojshme për procesin.