Nuk kanë të sosur telashet me drejtësinë për Ardian Xhillarin, ish biznesmenin e hidrokarbureve, i cili disa muaj më parë u dënua nga gjykata me 10 vite burg. Kur kanë kaluar vetëm 3 muaj kur u dënua me 10 vite burg nga togat e zeza të kryeqytetit për abuzimin me tregtimin e naftës virxhin, Xhillari është në një proces gjyqësor me një biznesmen tjetër, i cili e akuzon Xhillarin për mashtrim. Pas këtyre akuzave në Gjykatën e Tiranës ka nisur ky proces ndaj tij. Gazeta “Sot” ka mësuar se bëhet fjalë për një shumë prej 400 mijë eurosh, që dyshohet se Xhillari ia ka marrë biznesmenit në formë huaje dhe nuk ja ka kthyer. Sipas kallëzuesit, ai ka marrë mbrapsht një pjesë të vogël të shumës së dhënë. Për këtë arsye, biznesmeni e ka kallëzuar penalisht Xhillarin. Sipas dosjes hetimore, mësohet se Xhillari ka paguar vetëm interesin e huasë. Gjyqi ndaj ti po zhvillohet në Gjykatën e Tiranës, ndërsa Xhillari pretendon se shuma që është marrë nga biznesmeni kallëzues është më e vogël se 400 mijë ero. Në seancën e fundit, Gjykata e Tiranës vendosi që të kryej një ekspertim daktiloskopik për firmën e Ardian Xhillarit në një dokument që shërben si provë e Prokurorisë ku ka firmosur për marrjen e huasë. Mbrojtja pretendon se dokumenti është falsifikuar dhe se firma në të nuk është e Xhillarit. Ardian Xhillari u arrestua disa muaj më parë Frankfurt. Ai fshihej në Zvicër prej disa kohësh për ti shpëtuar drejtësisë, ku dhe kishte kërkuar azil. Arrestimi i tij u bë pasi tentoi të arratisej pasi kuptoi se autoritetet zvicerane ishin vënë në ndjekje të tij pasi në vendin ku ai kishte kërkuar azil, autoritetet shqiptare kishin dërguar dosjen dhe ishte shpallur në kërkim nga Interpol Tirana. Burime thonë se Xhillari pritet të ekstradohet brenda kësaj jave për të vuajtur dënimin. Gjithashtu ish biznesmeni pritet që shumë shpejt të jetë në gjykatë për t’u përballur me akuzat për “mashtrim
Dënimi i Xhillarit
Biznesmeni i njohur u dënua për “fshehje e të ardhurave”, mospagim taksash” dhe “pastrim parash”. Sipas konkluzioneve të Gjykatës së Tiranës rezulton se Xhillari ka kryer transportin fiktiv të sasisë prej 4.406.855 litra ose 3.251.688 kg të artikullit “naftë virgine” që ajo kishte depozituar në magazinën fiskale në Kodër Mëzez, Tiranë për në magazinën doganore Ballsh. Biznesmeni Xhillari u fajësua për veprat penale të “fshehjes së të ardhurave”, “mospagimit të taksave” dhe “pastrimit të parave”. Në vendimin prej 78 faqesh në total, gjykata arsyeton se biznesmeni ka realizuar të ardhura të paligjshme, që nuk i ka deklaruar, nuk ka paguar detyrimet tatimore, si edhe ka riqarkulluar të ardhurat e krijuara në mënyrë të paligjshme nëpërmjet sistemit bankar. Xhillari u dënua në mungesë. Ashtu si administratori i saj, fajtore u shpall edhe shoqëria “Tea Construksion & Petrol” në cilësinë e personit juridik. Për të, gjykata vendosi “mbarim të personin juridik”, c’ka do të thotë mbylljen e saj. Ardian Xhillari u gjykua në mungesë, pasi ai iu fsheh drejtësisë menjëherë pas zbulimit të skandalit. Biznesmeni u largua nga Shqipëria në vitin 2014 dhe pas akuzave nga ana e prokurorisë ai u shpall në kërkim. Ndërkohë që vetëm tre ditë pas pretencës së organit të akuzës, ku kërkoi dënimin me 15 vjet për biznesmenin, Xhillari u arrestua në shkurt në Gjermani. Arrestimi i Xhillarit është bërë nga INTERPOL-i gjerman dhe ai zviceran në bashkëpunim me INTERPOL Tirana, pas shpalljes në kërkim ndërkombëtar nga autoritetet shqiptare. Gjykata e Tiranës në vendimin e saj shpalli deklarimin fajtor të pandehurit Ardian Xhillari për veprën penale “Fshehja e të ardhurave” të parashikuar nga neni 180/3, dhe dënimin e tij me 7 vite burgim. Gjithashtu ai u deklarua fajtor, për veprën penale “Mospagimi i Taksave” të parashikuar nga neni 181 i Kodit Penal dhe dënimi i tij me 2 vite burgim. Gjykata shpalli fajtor të pandehurit Ardian Xhillari edhe për veprën penale “Pastrimi i produkteve të veprës penale ose veprimtarisë kriminale” të parashikuar nga neni 287/3 të Kodit Penal, dhe dënimin e tij përfundimtar me 15 vite burgim. Gjithashtu në zbatim të nenit 40 të Kodit Penal gjykata vendosi heqjen e së drejtës të ushtrimit të detyrave drejtuese për një periudhë prej 10 vitesh për të pandehurin Ardian Xhillari. Ish biznesmeni u gjykua me gjykim të shkurtuar dhe përfitoi 1/3 e uljes së dënimit.
Elvis Myrta