Me një fjalim të gjatë, në foltoren e Kuvendit, kryeministri Edi Rama nuk i ka fshehur rezervat për presidentin Ilir Meta, pasi ky i fundit refuzoi të dekretojë Sandër Lleshin si ministrin e ri të Brendshëm.
Ndërsa ka komentuar deklaratën e një ditë më parë presidenciale, sa i takon takimit me dyer të mbyllura këtë të diel mes tyre në residencë, Rama i ka bërë edhe një paralajmërim Metës, kur uron që qëllimin e mosdekretimit të Lleshit të mos e ndajë pas disa kohësh me shqiptarët.
“Të njëjtën ndjesi pata edhe kur e lexova deklaratën e djeshme të presidentit, pavarësisht mbylljes së dhimbshme të saj me atë shprehjen se koha e drejtimit të shtetit me sekretar të parë ka përfunduar një herë e përgjithmonë.
Më erdhi një replikë në majë të gjuhës për një mbyllje kaq të pazakonte për një deklaratë presidenciale.
Nuk do i kisha lënë pa komentuar edhe referencat e sforcuara që presidenti i bën vetes si komandant i përgjithshëm, apo kryetari i Këshillit të Sigurisë Kombëtare, qoftë te letra e refuzimit apo deklarata për takimin. Është krijuar një situatë e paprecedentë prej refuzimit të paprecedent të presidentit. Është moment delikat sepse është vënë në pikëpyetje një ekuilibër i rëndësishëm institucional i vendit.
Uroj me gjithë zemër që e gjitha kjo të mos bëhet me ndonjë qëllim që shkon përtej dekretit për gjeneral Sandër Lleshin. Këtë ia thashë edhe Presidentit, shumë sinqerisht, por koha mos e sjelltë që më duhet ta ndajë me shqiptarët pse po e bëj këtë urim sot”, u shpreh Rama.
