Elmas Bogdani
Belind Këlliçi, krahu i djathtë i Sali Berishës, një figurë e njohur politike dhe një nga njerëzit më të afërt të tij, dyshohet se nuk ka përfunduar as arsimin e mesëm. Dosja me provat dhe dokumentet që vërtetojnë këtë mashtrim ka përfunduar tashmë në duart e SPAK (Struktura e Posaçme Kundër Korrupsionit dhe Krimit të Organizuar). Kallëzimi penal është bërë nga avokati i njohur Idajet Beqiri.
Në dosjen që ka siguruar gazeta “SOT”, thuhet se Këlliçi në datën 24 mars 2023 ka plotësuar një “Formular Vetdeklarimi” para Komisionit Qendror të Zgjedhjeve në të cilin ka theksuar se për periudhën e viteve 2005-2009 ka qenë me studime universitare në Galtimore, Maryland të SHBA. Sipas kallëzimit penal, në fakt deputeti Belind Këlliçi nuk kishte mbaruar arsimin e mesëm, për rrjedhojë nuk mund të ndiqte dot studimet e larta në SHBA.
Kallëzimi i plotë nga Idajet Beqiri në SPAK
“Zoti Belind Këlliçi ka frekuentuar institucionin arsimor “Harry Fultz”, në Tiranë, e cila është një shkollë e arsimimit të mesëm. Drejtoresha e Shkollës “Harry Fultz”, Brikena Baxhaku ka konfirmuar zyrtarisht dhe në disa masmedia se deputeti Belind Këlliçi kishte përfunduar vetëm 4 vite nga 5 që duheshin kryer në këtë institucion. Këtë fakt ajo ja ka bërë të ditur deputetit Plarent Ndreca, i cili i ishte drejtuar asaj me një kërkesë për të marrë një informacion zyrtar rreth faktit nëse deputeti Belind Këlliçi e kishte përfunduar ose jo arsimin e mesëm. Drejtoresha e Shkollës “Harri Fultz”, Znj.
Brikena Baxhaku, fillimisht ka tentuar të mbuloj të vërtetën rreth arsimimit të ish deputetit Belind Këlliçit, sepse në përgjigjen që i ka dërguar deputetit Plarent Ndreca, ka theksuar se nxënës të Shkollës “Harry Fultz”, të cilët kanë plotësuar kreditet, dhe ende nuk kishin mbaruar plotësisht shkollën e mesme, janë regjistruar në universitete në Europë dhe SHBA. Në fakt këto raste sporadike mund të jenë të vërteta, por vetëm pas vitit 2006, kur ka hyrë në fuqi matura shtetërore, dhe lëndët janë pikëzuar me kredite. Ndërsa ish deputeti Belind Këlliçi e ka frekuentuar Shkollën “Harri Fultz” para vitit 2005.
Matura Shtetërore ka nisur në vitin 2006, dhe në databazën e Maturës Shtetërore nuk ka asnjë të dhënë për Belind Këlliçin. Nisur sa sipër rezulton se ish deputeti Belind Këlliçi ka përdorur dokumente të falsifikuara për të aplikuar në universitetin amerikan Coppin State University në Maryland, duke kapërcyer procesin e rregullt të diplomimit nga shkolla e mesme. Ish deputeti Belind Këlliçi ka njëhësuar diplomën e universitetit të Coppin University SHBA, në Shqipëri. Me këtë rast njësimi të diplomës Zoti Belind Këlliçi ka deklaruar se ka përfunduar shkollën e Mesme, në një kohë që ky fakt nuk është i vërtetë sepse është bërë me një akt zyrtar të falsifikuar, si në institucionet shqiptare, ashtu dhe në ato amerikane. Pas publikimit të këtyre të dhënave, ish deputeti Belind Këlliçi ka ndërmarrë një fushatë shantazhi ndaj drejtoreshës së Shkollës “Harri Fultz” Blerina Baxhaku për ta detyruar atë për të falsifikuar të dhënat në dokumentet zyrtare sikur ai e kishte mbaruar plotësisht gjimanzin “Harry Fultz”.
Formulari i Vetdeklarimit
Por më e rëndë është fakti se kemi të bëjmë me një vepër penale vazhduese, sepse këtë dokument të falsifikuar, pra mungesën e diplomës së shkollës së mesme, mos përfundimin e arsimit të mesëm, kapërcimin e kësaj hallke të detyrueshme arsimore, pa të cilën nuk mund të katapultosh në Universitet, ish deputeti Belind Këlliçi nuk e ka deklaruar edhe në Formularin e Vetdeklarimit që ka paraqitur si kandidatë për kryetar bashkie në Tiranë para Komisionit Qëndror të Zgjedhjeve në datën 24.03.2023 ku rezulton të mos ketë deklaruar përfundimin ose jo të Shkollës së Mesme dhe sesi ka kaluar në Universitet, pa përfunduar këtë hallkë të detyrueshme ligjore në sistemin arsimor në Republikën e Shqipërisë
Sa vite burg rrezikon Këlliçi?
Neni 190 i Kodit Penal thotë se: “Falsifikimi ose përdorimi i vulave, i stampave apo i formularëve të falsifikuar ose paraqitja e rrethanave të rreme në këto të fundit, që u drejtohen organeve shtetërore, dënohet me burgim nga gjashtë muaj deri në katër vjet.” Ndërkaq, mbetet mister burimi i të ardhurave të Belind Këlliçit për udhëtimet në SHBA, foton që kushton 25 mijë USD me Presidentin e zgjedhur të SHBA, Donald Trump, pushime, mbjellja e flokëve etj., në kushtet kur prej më shumë se 1 vit nuk merr rrogë, pra është i papunë.
Mungesa e transparencës karakterizoi edhe burimin e financimit të fushatës së tij elektorale në garën për Bashkinë e Tiranës, ku humbi me 60 mijë vota diferencë. Gjatë fushatës zgjedhore Belind Këlliçi publikoi 204 reklama, duke shpenzuar në total 8082 USD vetëm në Facebook dhe Instagram. Një listë me donatorët të dorëzuar nga Belind Këlliçi në KQZ, bashkë me shumat përkatëse, nuk mbulonin as 5% të shpenzimeve të bëra nga ana e tij. Në deklaratat e pasurisë së ish deputetit të PD Belind Këlliçi nuk figuron pasuria e bashkëjetueses së tij, Anna Shkreli, me të cilën u shfaq edhe në emisione televizive gjatë fushatës për Bashkinë e Tiranës.
ILDKPKI ende nuk i ka dhënë përgjigje këtij standardi të dyfishtë. Partnerja e tij Anna Shkreli rezulton se ka përfituar para publike nga disa ente shtetërore, si person fizik me nipt M01804027N. Partnerja e Belind Këlliçit, Anna Shkreli është paguar, pra ka marrë rrogë edhe nga Bashkia e Tiranës, para të cilës proteston parteneri i saj. Konkretisht Anna Shkreli rezulton e punësuar pranë Muzeut të Bashkisë Tiranë “Shtëpia Studio Kadare”.
Neni 180
Fshehja e të ardhurave: “Fshehja apo shmangia nga pagimi e detyrimeve tatimore, nëpërmjet mosdorëzimit të dokumenteve ose mosdeklarimit të të dhënave të nevojshme, sipas legjislacionit në fuqi, dorëzimi i dokumenteve të falsifikuara, apo deklaratave ose informacioneve të rreme, me qëllim fitimin material, për vete apo për të tjerët, përmes përllogaritjes së pasaktë të shumës së tatimit, taksës, apo kontributit, përbën vepër penale dhe dënohet me burgim deri në tre vjet. Kur kjo vepër kryhet me qëllim fshehjen apo shmangien nga pagimi të një detyrimi tatimor me vlerë më të lartë se pesë milionë lekë, dënohet me burgim nga dy deri në pesë vjet. Kur kjo vepër kryhet me qëllim fshehjen apo shmangien nga pagimi të një detyrimi tatimor me vlerë më të lartë se tetë milionë lekë, dënohet me burgim nga katër deri në tetë vjet”.
Neni 257/a
Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim. “Refuzimi për deklarimin ose mosdeklarimi i pasurisë, interesave privatë të personave të zgjedhur ose nëpunësve publikë ose i çdo personi tjetër që ka detyrimin ligjor për deklarim sipas ligjit, kur më parë janë marrë masa administrative, përbën kundërvajtje penale dhe dënohet me gjobë ose me burgim deri në 6 muaj.
Fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim, dënohet me gjobë ose me burgim deri në tre vjet.” Sa më sipër, vlerësoj dhe ju kërkojmë të regjistrohet procedimi penal dhe të kryhen veprimet e duhura hetimore si dhe të vendoset sekuestro konservative mbi pasuritë e tundshme dhe të patundshme të Belind Këlliçit për të siguruar kështu vlerën e dëmit civil në procesin penal”, thuhet në kallëzimin penal që ka shkuar në tavolinën e SPAK.