Kategoria e Parë po dhuron më shumë emocione sesa Superiorja, nisur nga emrat e klubeve që militojnë aty dhe natyrisht rivaliteti i krijuar për dy vende që të ngjisin në elitë. Humbja e Dinamos i dha mundësinë Skënderbeut të merrte kreun, kurse në Kategorinë e Dytë, u luajt dje një prej ndeshjeve më të rëndësishme, ajo mes Elbasanit dhe Pogradecit, që prodhoi emocione, por edhe tension e në fund autobusi i pogradecarëve u sulmua me gurë. Ndeshja u mbyll mes tensionit me shifrat 1-1 ku pogradecarët ia dolën që t’i merrnin 1 pikë vendasve në këtë sfidë, edhe pse mbetën me 9 lojtarë. Pas ndeshjes, pogradecarët kanë festuar këtë arritje që i mban përsëri në vendin e parë në renditjen e kampionatit dhe i sheh si favoritë për ngjitjen më lart në edicionin e ardhshëm. Por festa e tyre është prishur nga një incident jo i vogël gjatë kthimit me autobus. Në dalje të Librazhdit, një makinë në ecje e sipër ka kaluar pranë autobusit të pogradecarëve dhe i ka gjuajtur me gurë. Për fat të mirë, incidenti ka përfunduar me xhama të thyer, por jo me lëndime të lojtarëve apo pjesëtarëve të stafit që gjendeshin në autobus dhe po ktheheshin në shtëpitë e tyre, Një ngjarje e rëndë që shëmton një sfidë mes dy pretendentësh, por nga ana tjetër duhet thënë se barazimi i djeshëm i përforcon pozitat e skuadrës pogradecare.
Dinamo humb në kryeqytet, e mund Tomori me 10 vetë
Dinamo ka ngecur sërish në kampionat, kësaj radhe duke humbur 0-1 në “Selman Stërmasi” përballë Tomorit, në sfidën e vlefshme për javën e 17-të të Kategorisë së Parë. Gjërat u bënë të vështira për beratasit, të cilët u ndëshkuan me karton të kuq në minutën e 16-të, por sërish e menaxhuan mirë lojën. Rastet nga “Blutë” nuk munguan, por pa mundur të gjenin rrjetën. Gjithsesi ishte Dushkaj, i cili në minutën e 92-të pas një kundërsulmi vrastar gjeti rrjetën. Pas një tensioni në fushë, edhe me vendasit ngelën me 10 lojtarë, pas daljes me të kuq të Markut. Kështu Dinamo shkon në tre ndeshje radhazi pa fituar, duke i lëshuar kreun e renditjes Skënderbeut, ndërsa Tomori pas kësaj fitoreje ngjitet në zonën “play-off”-it.
Skënderbeu në kryesim, zhgënjen Korabi
Dy ditë më parë, Skënderbeu fitoi dhe mori kryesimin e Kategorisë së Parë. Korçarët ia dolën të triumfojnë 2-1 ndaj Luzit në Korçë dhe të ngjiten në krye me 33 pikë, dy më tepër se Dinamo e vendit të dytë. Gjithsesi vlen të theksohet se kryeqytetasit luajë nesër ndeshjen e javës së 17-të. Korçarët e Gvozdenovic vuajtën jo pak për të marrë fitoren, teksa sfida u zhbllokua vetëm në minutën e 51-të nga Randi. Në të 71-tën Cahani riktheu baraspeshën, pro Frashëri shënoi golin me vlerë tre pikëshe tre minuta para fundit të takimit. Zhgënjeu sërish Korabi (të shtunën), i cili pësoi humbjen e dytë radhazi, këtë herë në transfertën ndaj Turbinës. Dibranët vinin pas humbjes minimale 1-0 ndaj Luzit dhe regjistruan të njëjtin rezultat edhe në Cërrik, duke zbritur në vendin e katërt me 26 pikë. Derbi i Myzeqesë mes Lushnjës dhe Apolonisë u mbyll pa fitues pasi dy skuadrat ndanë nga një pikë, falë barazimit 1-1. Basha u dha avantazhin lushnjarëve në pjesën e parë, ndërsa në të dytën ishte gjata që shënoi golin e barazimit. Në Orikum, vendasit mposhtën Burrelin me rezultatin 2-1