Aktgjykimi ndaj liderit serb të Bosnjës Milorad Dodik për aktakuzën që e akuzon për mosrespektim të vendimeve të përfaqësuesit të lartë të bashkësisë ndërkombëtare do të shpallet më 26 shkurt, konfirmoi dje gjyqtari Sena Uzunoviç. Pas seancës, në të cilën Dodik dhe mbrojtja e tij, si dhe përfaqësuesit e Prokurorisë së Bosnjës dhe Hercegovinës, paraqitën fjalët e tyre përfundimtare, Uzunoviç tha se do ta shpallte vendimin jo-përfundimtar të mërkurën e ardhshme në orën 13:00. Dodik, duke dhënë deklaratën e tij përfundimtare, i tha gjyqtares se ajo tani kishte një “përgjegjësi të madhe”, që do të thotë se ajo duhej të vendoste nëse do të vepronte në bazë të ligjit apo politikës dhe pas përfundimit të seancës, ai u tha gazetarëve jashtë selisë së Gjykatës së BiH se në rast të një vendimi fajësie, parlamenti i Republikës Srpska do të vepronte menjëherë dhe do të “merrte vendime të rëndësishme”.
Dënimi që rrezikon
“Një dënim mund t’i japë një goditje vdekjeprurëse Bosnje dhe Hercegovinës,” kërcënoi Dodik, i cili pretendon se gjyqi është pjesë e një komploti që synon largimin e tij nga politika. Prokurori Nedim Ćosić kërkoi që Dodik dhe drejtori i Gazetës Zyrtare të Republika Srpska, Millosh Lukiç, të shpallen fajtorë dhe të dënohen me një dënim me burg që do të ishte afër maksimumit të parashikuar me ligj, i cili mund të jetë deri në pesë vjet. Ai gjithashtu kërkoi që Dodikut, ashtu si Lukiç, t’i ndalohet mbajtja e posteve në organet ekzekutive ose legjislative për një periudhë dhjetëvjeçare, gjë që praktikisht do ta dërgonte Presidentin aktual të RS në pension politik, sepse ai nuk do të kishte më të drejtë të kandidojë për postin në zgjedhje.
Kërcënimet e Dodik
Presidenti i Republikës Srpska Milorad Dodik dha fjalën e tij përfundimtare në seancën, në procedurën gjyqësore kundër tij. Ndër të tjera ai tha se është i gatshëm që në luftën politike të shkojë deri në fund. Ai përsëriti se ky është një proces politik. Me atë rast ai tha: “Më vjen mirë që Prokuroria solli në vend të meje Schmidt, i cili shkel Kushtetutën, por kjo mund të shkaktojë probleme më të mëdha”. “Nuk po kërcënoj, por jam gati të shkoj deri në fund në një luftë politike”, tha Dodik. Ai theksoi se është i vetmi njeri në Evropë që gjykohet për një krim që nuk është miratuar nga parlamenti, por është marrë me vendim, duke kujtuar se ligjet mund të miratohen vetëm nga parlamentet dhe se ato nuk mund të ndryshohen me vendime. Ai deklaroi se ka vepruar në përputhje me Kushtetutën e Republika Srpska, dhe automatikisht Kushtetutën e BeH. “Është e turpshme që Prokuroria e BiH-së po mbron Schmidt-in kundër meje, një qytetar i BiH-së,” vuri në dukje Dodik, duke pyetur Prokurorinë në emër të kujt po punojnë dhe pse kanë frikë nga të huajt.
Mbështetje nga Vuçiç dhe Orban
Presidenti serb Aleksandër Vuçiç doli gjithashtu në mbrojtje të Dodik, duke thënë se ai shpresonte për “vendime të mençura” nga gjykata për të parandaluar destabilizimin e mëtejshëm të BiH. Dodik mori një mbështetje të ngjashme të hënën në Budapest nga kryeministri hungarez Viktor Orban, i cili, pas një takimi mes dy politikanëve, tha se “sulmet politike” ndaj Dodik tani duhet të ndalen dhe se “ai duhet të ndalojë së ndëshkuari”. Dodik është nën sanksione nga SHBA dhe Britania e Madhe dhe masat e para ndëshkuese ndaj tij janë vendosur në vitin 2017 për rrezikim të zbatimit të Marrëveshjes së Dejtonit. Lista e individëve të sanksionuar nga rrethi i tij i njerëzve me të njëjtin mendim është rritur ndjeshëm, me sanksionet e fundit të vendosura ndaj ministrit të tij të Brendshëm, Sinisa Karan, në janar. Administrata e SHBA më pas njoftoi se Karan ishte përfshirë aktivisht në një grup pune të urdhëruar nga Dodik për të përgatitur plane operacionale për shkëputjen e RS nga Bosnja dhe Hercegovina.
