Afrimi i SPAK dhe BKH duket se ka futur në merak një pjesë të madhe të politikës shqiptare. Edhe sherri Rama-Meta duket se për bazë ka pikërisht reformën në drejtësi. Të dielën gazeta e tregoi se meraku më i madh i Ilir Metës duket se është Struktura e Posaçme Antikorrupsion, ndërsa sot po tregojmë luftën që është bërë për këtë proces. Presidenti Ilir Meta në çdo dalje të tij ka sulmuar Sorosin, sulm ky që indirekt është për reformën në drejtësi. Ndërkohë që faktet tregojnë më shumë, rreth sulmeve të Metës ndaj reformës. E para ka të bëjë me vakancat për Këshillin e Emërimeve në Drejtësi, short të cilin kreu i shtetit nuk e hodhi, pasi herë pas herë justifikohej me argumentin se duhen të ndryshohen ligjet e reformës në drejtësi. Ndërsa po ashtu, gazeta mësoi se presidenti Ilir Meta ka sulmuar reformën në drejtësi edhe gjatë takimeve të fundit që ka zhvilluar më zyrtarë të Bashkimit Europian dhe Shteteve të Bashkuara të Amerikës dhe ambasadorë të huaj të atashuar në vend. Mësohet së në këto takime, Meta ka artikuluar idenë së kjo reformë është kapur nga qeveria. Ndërkohë që po ashtu, Meta duke mos pasur besim tek Operacioni Ndërkombëtar i Monitorimit, i cili po monitoron procesin e vettingut dhe reformën në drejtësi, ka kërkuar që ndërkombëtarët të sjellin një grup tjetër monitorues. Madje, Meta këtë e pohoi edhe pak ditë më parë gjatë intervistës me Adi Krastën në televizionin Neës 24. “Në vlerësimin tim, padyshim që ka patur dhe ka probleme serioze në zbatimin e Kushtetutës në reformën në drejtësi. Unë këto çështje i kam bërë të ditura, edhe në pozicionin e presidentit tani, por edhe më parë në pozicionin e Kryetarit të Kuvendit, por edhe në raport me partnerët tanë ndërkombëtarë. Madje, dhe u kam kërkuar atyre, rasti më i fundit Drejtori i Përgjithshëm i Zgjerimit, zoti Danielsson, që të sjellin njerëz që të verifikojnë se si janë zbatuar të gjitha ato angazhime dhe detyrime”, deklaroi Meta. Ndërsa rasti më i freskët, që Meta sulmoi reformën në drejtësi ishte të shtunën që lamë pas, duke treguar se meraku i tij i vetëm është pikërisht kjo reformë dhe frika që ka ai nga ngritja e SPAK dhe BKH. “Nuk ka komision garancish statutore që ndalon Presidentin e Republikës të ushtrojë kompetencat e tij të qarta kushtetuese për emërim e shkarkim ministrash. Duhet të jetë e qartë për pengmarrësin e reformës në drejtësi: Aksioni për rivendosjen e plotë të rendit kushtetues e ligjshmërisë nuk ndalet”, deklaroi zëdhënësi i Presidencës, Tedi Blushi.
LSI sulmon reformën në drejtësi
Në një linjë me presidentin Ilir Meta është rreshtuar edhe ish-partia e tij, Lëvizja Socialiste për Integrim, eksponentë të së cilës kanë sulmuar fort reformën në drejtësi. Pak ditë më parë, kreu i grupit parlamentar të LSI sulmoi hapur ngritjen e KLP dhe KLGJ. “Këshilli i Lartë i Prokurorisë me integritet shumë të ulët dhe në funksion të kapjes! KLP integriteti tepër të ulët i të cilit njihet publikisht sepse pjesa dërrmuese e anëtarëve të tij janë kontestuar nga ONM si pa integritet dhe jo vetëm nga ONM, megjithatë vazhdon të marrë vendime. Ecja në këtë rrugë është në funksion të kapjes nga kryeministri për të mbyllur aferat e pafund të tij dhe qeverisë së tij, ndaj i duhet një KLP e kapur dhe organe që ngrihen prej saj gjithashtu të kapura. KLP, megjithëse ligji i mundësonte konstituimin, por i pengonte veprime të tjera sepse Gjykata Kushtetuese ka shfuqizuar nenet përkatëse, po vazhdon në rrugën e paligjshmërisë”, deklaroi Vasili. Pra, ky sulm i Vasilit ndaj KLP erdhi në kohë kur ky organ hapi garën për ngritjen e SPAK, duke treguar qartë që edhe LSI ashtu si Meta, janë trembur nga krijimi i Strukturës së Posaçme Antikorrupsion.
Rigels Seliman