Korrupsioni në sistemin e drejtësisë ishte një problem që doli në pah nga procesi i vetingut. Nga të gjitha seancat dëgjimore të zhvilluara deri tani, rezulton se midis të shkarkuarve janë qoftë prokurorët dhe gjyqtarët e thjeshtë, por po ashtu edhe drejtuesit e tyre. Në gjithë këto muaj punë, komisioni i vetingut ka shkarkuar nga detyra 35 emra, nga të cilët shtatë janë krerë gjykatash dhe prokurorish. Shkarkimi i tyre më së shumti ka ardhur për shkak të problemeve të shumta me pasurinë. Përjashtimi nga sistemi i drejtësisë i kryetarëve të gjykatave dhe prokurorive nisi që në muajin korrik, kur nga detyra u shkarkua drejtuesi i Prokurorisë së Tiranës, Dritan Rreshka. Problemet e tij konsistonin në dy katet e një shtëpie me vlerë 2.5 milionë lekë, për të cilat kishte mospërputhje mes deklaratash dhe në blerjen e obligacioneve me vlerë 7.9 milionë lekë, për të cilat nuk kishte burime të mjaftueshme financiare për t’i justifikuar. Për shkak të këtyre problemeve, KPK e shkarkoi nga detyra. Duhet theksuar fakti se Dritan Rreshka është kryetari i vetëm i prokurorive në vend deri tani i cili është shkarkuar. Ndërsa nga drejtuesit e gjykatave deri tani janë spastruar gjashtë emra: Entela Prifti (Gjykata e Apelit Civil Korçë), Alma Liçaj (Gjykata e Apelit Civil Vlorë), Izet Kadana (Gjykata Pukë), Admir Belishta (Gjykata Korçë), Agron Vavla (Gjykata Berat) dhe Bashkim Dedja (Gjykata Kushtetuese).
Shkarkimet e kryegjyqtarëve
Komisioni i Pavarur i Kualifikimit e nisi valën e shkarkimeve në radhët e kryetarëve të gjykatave me Entela Priftin. Në muajin tetor trupa gjykuese vendosi ta largojë nga sistemi i drejtësisë për shkak të problemeve me pasurinë. Hetimi i thelluar i KPK i zbuloi disa llogari bankare të padeklaruara në emër të fëmijëve të gjyqtares dhe bashkëshortit të saj, mbi 70 mijë euro, 4 apartamente në Tiranë si edhe deklarime të pasakta në kontratat e shit-blerjeve në automjete. Shkarkimi i kryetares së Gjykatës së Apelit Civil Korçë u pasua nga shkarkimi i kryetares së Gjykatës së Apelit Civil Vlorë, Alma Liçaj. Sipas KPK, gjyqtarja Alma Liçaj dhe bashkëshorti i saj zotërojnë dy apartamente në Vlorë, dy apartamente në Tiranë të blera për 97 664 euro dhe 60 mijë euro si dhe dy njësi banimi me sipërfaqe 43 m2 dhe 95 m2, së bashku me një garazh prej 35 metrash katrorë në qytetin e Vlorës. Problemet me pasurinë rrezikuan karrierën edhe të kryetarit të Gjykatës së Korçës, Admir Belishta dhe të Gjykatës së Beratit, Agron Vavla. Këtij të fundit iu gjetën probleme me një apartament në Tiranë e një tjetër në Berat, si edhe me një hua të marrë nga një i afërm në Itali në shumën 30 mijë euro. Admir Belishta nga ana tjetër, përveç problemeve me pasurinë, kishte kontakte edhe me krimin e organizuar. I papërshtatshëm në integritetin e figurës rezultoi para KPK edhe kryegjyqtari i Pukës, Izet Kadana. Përtej të tjerash, ai po ashtu u cilësua si pa etikë në punë sepse kishte kërcënuar një person për të punësuar gruan e tij në Prokurorinë e Përgjithshme. Po ashtu, nuk i munguan as problemet me pasurinë sepse nuk justifikonte një kredi të marrë nga bashkëshortja në masën 700 mijë lekë si dhe dy hua që gjyqtari i ka dhënë personave të tjerë me vlerë totale prej 8.4 milionë lekësh. Midis krerëve të gjykatave të shkarkuar në vend bën pjesë edhe emri i Bashkim Dedjes. Ai drejtonte Gjykatën Kushtetuese, por ndryshe nga kryegjyqtarët e tjerë, Dedja u shkarkua nga Kolegji i Posaçëm i Apelimit. Atij ju gjetën probleme me dy apartamente në Tiranë dhe një apartament në Golem, për të cilin kishte deklaruar se ishte në emër të të vëllait, por fatura e OSHEE ishte në emrin e Dedjes. Pra, vendimet e deritanishme të KPK për të larguar nga drejtësia 7 krerë gjykatash dhe prokurorish tregon qartë se korrupsioni është i shtrirë deri tek drejtuesit, të cilët kanë mijëra euro pasuri të pajustifikuara.
Mimoza Ibra