Rivaliteti për “Topin e Artë” u ka future “ethet” rivalëve në garë. Lamine Jamal foli për paraqitjen e tij në fushë, sidomos pas dy golave të tjerë dhe u ngjit në krye të listës së golashënuesve të La Ligës, duke barazuar me nga gjashtë gola Rafinja, Mbape dhe Camello.
Por sulmuesi i Barcelonës foli edhe për atë që ndodh jashtë fushës. Në një pjesë të intervistës për “Universo Valdano”, e cila do të transmetohet më 18 shtator në Movistar+ në orën 21:00, Yamal u shpreh hapur për kandidaturën e tij për të fituar “Topin e Artë”, çmim që do të dorëzohet më 26 tetor në Londër. “Unë kujt do t’ia jepja?
Lojtarit më të mirë në botë. Kujt do t’ia japin? Sinqerisht, si më të mirët në botë, mendoj se mund të jemi dy: unë dhe Mbape. Por mendoj se këtë vit do ta meritoja unë, për atë që kam fituar. Të gjithë ata që i shohin ndeshjet e dinë”, tha Jamal. Mes arritjeve të tij janë tituli në Spanjë dhe sueprkupa me Barcelonën, ndërsa në aspektin personal ai vendosi rekordet e tij më të mira me 24 gola dhe 18 asistime.
Me kombëtaren spanjolle, Jamal fitoi gjithashtu Kupën e Botës verën e kaluar në SHBA. Megjithatë, vetë 19-vjeçari pranoi se nuk mbeti plotësisht i kënaqur me paraqitjen e tij në Botëror. “Pas fitimit të Botërorit nuk isha i kënaqur. Është e vërtetë që pata një dëmtim, por kjo nuk ka të bëjë me atë që mendoj. E di që, nëse Botërori do të përsëritej në një moment tjetër, do të kisha qenë në të njëjtin nivel edhe pa dëmtimin”, tha Jamal.
“Bëra shumë gjëra që njerëzit nuk i panë. Për shembull, mendoj se për trajnerin është diçka e jashtëzakonshme të ketë një lojtar që tërheq pas vetes tre kundërshtarë. Por nuk isha i kënaqur me veten, sepse e di që një lojtar tjetër me paraqitjen time do të kishte bërë një Botëror të madh. Për mua, mund të kisha bërë më shumë. E ndihmova ekipin, por mezi pres të vijë Botërori i ardhshëm.
Dua të mbetem në historinë e futbollit”, shtoi sulmuesi i Barcelonës. Pavarësisht se është vetëm 19 vjeç dhe ka fituar tashmë një Europian dhe një Botëror, si dhe tre tituj të La Ligës, dy Superkupa të Spanjës dhe një Kupë të Mbretit, Jamal thotë se nuk ka ndërmend të ndalet së fituari trofe.
“Ka pasur yje të mëdhenj në futboll, si Leo, Kristiano apo Diego, të cilin nuk kam pasur mundësi ta shoh duke luajtur, por askush nuk kishte fituar kaq shumë në një moshë kaq të re. Është rasti i Peles, i cili gjithashtu fitoi shumë gjëra herët. Ka njerëz që mendojnë se, pasi kam fituar disa trofe, do të relaksohem. Por unë e di se kam ende mijëra gjëra për të bërë për të mbetur në historinë e futbollit”, nënvizoi Jamal.
